Në ambientet e një hoteli në Tiranë po zhvillohet mbledhja e Kryesisë dhe Grupit Parlamentar nën drejtimin e Enkelejd Alibeajt, ku po diskutohen hapat që grupi i tij me 18 deputetë do të ndjekë në vijim, pasi Gjykata e Apelit i la “në duar” vulën e PD dhe pas kërkesës për regjistrimin në zgjedhjet lokale që u depozitua këtë të hënë në KQZ nga Indrit Sefa.
Nga informacionet që kanë rrjedhur nga mbledhja, rezulton se Alibeaj kërkon që kandidatët e dalë nga procesi i Primareve që ai më parë e ka refuzuar, të garojnë në 14 Maj nën siglën e PD, duke bërë thirrje për bashkimin, por duke përjashtuar Sali Berishën.
Sakaq në mbledhje, deputeti Gazmend Bardhi gjatë fjalës së tij kërkoi që të gjendet një zgjidhje e menjëhershme pasi opozita duhet të dalë me kandidatë unik më 14 Maj.
“Të gjendet zgjidhje, opozita duhet të dalë me kandidatë unik. Secili prej nesh ka bërë betejë për ta bërë partinë Demokratike fituese, alternativë qeverisëse. Gjatë kësaj kohe ka nevojë vetëm për maturi. Gjuha e urrejtjes nuk mund të ketë vend tek ne. Jemi 70 ditë larg nga zgjedhjet. Fokusi ynë duhet të jenë vetëm zgjedhjet e 14 Majit. Ne duhet të bëjmë çdo gjë që kemi në dorë, të ofrojmë çdo gjë, që të gjendet zgjidhje dhe PD e opozita të dalë me kandidatë të përbashkët”, tha ai.
