Ish-sulmuesi i Partizanit, Xhuliano Skuka, që tani është pjesë e ekipit të Metzit në Ligën e dytë franceze ka analizuar derbin e nesërm.
Ai ka treguar se pret një ftesë nga skuadra kombëtare si dhe ka treguar eksperiencën e tij të re në Francë.
“Më ka marrë malli shumë. Jam ambientuar shpejt këtu, edhe gjuha ma ka bërë më të lehtë.
Jam ambientuar edhe në fushë, por duhet të përmirësohem akoma më shumë. Doja të shënoja në debutim, por fati nuk ishte më mua.
E ke ndjekur Partizanin?
Po, të gjitha ndeshjet.
Ndihet mungesa jote?
Kur isha unë ishte krijuar loja rreth meje, tani që kam ikur besoj se ka një boshllëk. Por e kam ndjekur skuadrën dhe sulmuesit e tjerë po bëjnë mirë dhe po rriten ndeshja-ndeshjes.
Kur mund të bëhesh lider te Metz?
Është e vështirë kur transferohesh në janar, sepse ekipi është i ndërtuar. Nuk jam në formën time optimale, duhet edhe shumë punë, por besoj që nëse vazhdoj me këto ritme shumë shpejt do të mund të bëhem i rëndësishëm për skuadrën time.
Oshilacionet e Partizanit, çfarë po ndodh pas ikjes tënde?
Me aq sa kam parë, mendoj që lojën që bën Partizani nuk e bën asnjë skuadër në Shqipëri. Partizanit i mungon finalizimi, duhet të ketë një qendërsulmues (numër 9), që të garantojë gola. Kur kam qenë unë grupi ka pasur shumë harmoni, mes lojtarëve dhe stafit. I kam pyetur çunat pas largimit dhe më thonë që situata është e mirë, e njëjtë.
Pretendentët për titull dhe kush bie nga Superiorja?
Pretendent për titullin është Partizani, Tirana dhe Vllaznia, ndërsa për të rënë mendoj që janë Kastrioti dhe Bylisi. Rezultatet këto tregojnë, më vjen keq që e them këtë për këto dy skuadra. Akoma qëndroj unë dhe Xhixha në krye të listës së golashënuesve, është diçka e mirë për mua, por është diçka e keqe për kampionatin, sepse nuk ka më goleadorë që shënojnë shumë gola. I uroj Xhixhës të njëjtat gjëra që dua edhe për vete, sepse është një djalë shumë i mirë që meriton të gjithë të mirat në jetë dhe në karrierë.
Keni pasur kontakte me trajnerin e kombëtares gjatë kësaj periudhe?
Jo, nuk kam patur. E pres një ftesë nga kombëtarja, por të them të drejtën nuk kam bërë ndonjë gjë të madhe këtu në Francë.
Objektivi i radhës?
Do të doja të luaja në shumë ekipe të mëdha, pse jo te Barcelona, meqë jam edhe tifoz.
Serie A?
Kam menduar, por nuk zgjodha të transferohem tek Verona, që kisha oferta, sepse situata e tyre nuk ishte shumë e mirë në kampionat.
Nesër derbi i kryeqytetit?
Kam dashur të vija ta shihja nga afër, por nuk gjeta dot një biletë për të ardhur direkt në Tiranë. Por do e ndjek ndeshjen dhe me zemër do jem aty, tek Guerrilsat. Komunikoj gjithmonë me çunat. Skuadra nuk është moralisht aty ku duhet prej rezultateve, por besoj se do të raegojë dhe do të kthehet në formën optimale.
Rezultati i derbit?
Nuk e di, por duke marrë në konsideratë ndeshjet e fundit, mendoj që nuk do të ketë shumë spektakël. Derbin do ta vendosë eksperienca dhe mendoj që ata që kanë më shumë eksperiencë do të fitojnë.
Kolela duhet të qëndrojë?
Për mua personalisht duhet të qëndrojë, sepse është njeri pozitiv dhe sjell një frymë pozitive në grup. Trajneri duhet të qëndrojë sepse i trajton lojtarët si shokë”, ka thënë Skuka.
