Deputeti i Partisë Demokratike Kreshnik Çollaku, i cili është i rreshtuar në grupimin “Alibeaj”, në një koment të dhënë një ditë pasi Gjykata e Apelit vendosi të rikthejë për gjykim në Shkallën e Parë çështjen e vulës së selisë blu, ka bërë thirrje për bashkim në zgjedhjet e 14 Majit.
Sipas Çollakut, vula e forcës politike nuk duhet të shërbejë si një precedent për t’u futur të ndarë në zgjedhje, pasi kjo do t’i shërbente Edi Ramës dhe do të tregonte realisht se PD është e përçarë.
“Është çështje vetëm emrash, jemi brenda një familje politike. Ne kemi një sfidë që na përket të gjithëve, pavarësisht legjitimitetit, të shkojmë në zgjedhje të bashkuar. Të hënën mblidhet kryesia e PD-së. Mu duk e arsyeshme që nuk shoh asnjë lloj pengese. Në zgjedhjet e 14 majit nuk kemi pengesë për të hyrë të bashkuar”, tha Çollaku.
Në një intervistë për “Panorama TV”, ai gjithashtu shprehet se do i propozojë Enkelejd Alibeajt që në garë të pranohen edhe kandidatët e “Primareve”, një proces i zhvilluar nga Partia Demokratike nën drejtimin e Sali Berishës.
“Mund të jenë kandidatët e primareve, edhe aty ku ka pasur problematika. Ne mund të shkojmë të unifikuar. Është mundësia e vetme dhe e mirë që të garantojmë fitoren e PD-së. Rivalitete në PD mund të ketë gjithmonë, por më vonë mund të hapim një proces tjetër për zgjedhjen e strukturave. Të shkojmë të ndarë në zgjedhje është një dhuratë që nuk duhet t’ia bëjmë Ramës. Mund ta krijojmë konsensusin. Ky është apeli im.
Ne nga konflikti i brendshëm jemi të dëmtuar. Por unë mendoj se ne jemi në një kohë ekstreme dhe të ngushtë, por të paktën mund të dalim me një kandidat, të mos bëjmë rivalitet me njëri-tjetrin. Unë do i propozoj Alibeajt që kandidatët e Primareve të garojnë në zgjedhjet e 14 majit. Nuk ka pse të mos lejojmë kandidatët e primareve që të garojnë në 14 maj. Nëse kjo ndodh, atëherë kjo është ndarje”, deklaroi Çollaku.
