Një tjetër viktimë me origjinë shqiptare është regjistruar në tragjedinë e ndodhur në Greqi, ku një tren mallrash u përplas “kokë më kokë” me trenin e linjës Athinë-Selanik, me të cilën udhëtonin 350 pasagjerë.
Sipas TCH që i referohet burimeve në morgun e spitalit të Larisës, mes trupave të pajetë që ndodhen në morg, janë edhe dy trupa, të cilët deri në orët e pasdites nuk ishin kërkuar prej askujt dhe nuk ishte dhënë mostër për testin ADN.
Mësohet se njëra nga viktimat është shtetase shqiptare, 22 vjeçe, emri së cilës është Erieta Muhkli.
Me gjetjen e saj, numri i shqiptarëve që kanë ndërruar jetë në aksidentin tragjik të së martës në Tempi, arrin në 6 persona.
Ndërkohë, në total 57 persona kanë vdekur dhe dhjetëra të tjerë janë plagosur pas përplasjes së dy trenave.
Kjo fatkeqësi në Greqi ka nxitur zemërim dhe protesta në mbarë vendin, por po ashtu ka nxitur debatin lidhur me standardet e sigurisë në transportin hekurudhor.
Drejtori i stacionit të trenave në qytetin Larisa është arrestuar lidhur me këtë aksident. Për përplasjen e trenave, Qeveria ia ka lënë fajit gabimit njerëzor, që sipas punëtorëve të hekurudhave ishte i pashmangshëm për shkak të mungesës së sistemeve të sigurisë dhe numrit të vogël të punëtorëve.
