Kandidati i opozitës për bashkinë e Kuçovës në zgjedhjet lokale të 14 Majit, Lefter Maliqi ka publikuar në rrjetin social Facebook një video të rrugës në gjendje të mjerueshme që banorët e fshatit Velagosht duhet të përshkojnë çdo ditë për të arritur në qytet.
Rruga për të cilët banorët kanë protestuar disa herë para bashkisë së Kuçovës dhe kanë marrë premtimin e kryebashkikut Kreshnik Hajdari për një investim, ende mbetet në kushte që e bëjnë thuajse të pamundur lëvizjen e mjeteve.
Në postimin e tij, Maliqi shprehet se me zgjedhjen e tij si kryebashkiak, rruga që lidh Velagoshtin me Kuçovën do të përfundojë brenda 15 tetorit të këtij viti falë një projekti, që sipas tij edhe mund të kopjohet me nxitim nga administrate aktuale në fushatën zgjedhore.
“Velagosht: rruga si në mesjetë! Premtim! Të dashur banorë të Velagoshtit në 15 Tetor të këtij viti ju ftoj së bashku të inagurojmë rrugën asfalt të Velagoshtit nga qendra Velagosht-Rribes dhe deri sipër liqenit të Goraj-t deri në kufi me Drizën. Bashkia mund t’jua premtoj pas këtij postimi, megjithëse janë shumë vonë, por unë dua t’ju siguroj se jo vetëm Velagoshti por e gjithë Bashkia Kuçovë nga Lumasi-Perondi-Qytet-Kozare do kthehet në “Kantier Ndërtimi”.
Provat i kam dhënë në ish-Komunën Otllak nga Qereshniku-Virjoni-Dyshnik-Orizaj-Otllak-Lapardha-Lumas, deri në kufi me Perondin, çdo rrugë mbi 40 KM është e asfaltuar. Koha për vepra! Larg premtimeve boshe e mashtrimeve elektorale për 32 vjet! Respekte dhe Mirënjohje!”, shkruan Maliqi në Facebook.
