“Killeri” Dan Hutra që i mori jetën tre grave dhe plagosi tre të tjera më 1 Mars, në momentin e arrestimit nga policia në Sharrë iu tha efektiveve: “…Nuk kam asgjë me ju, por më lini të vras edhe një sot, Rahman Selën dhe ta mbyll…”.
Objektivi i katërt i Selës që realizoi një masakër dhe terrorizoi Tiranën në 6 orë, është rrëfyer sot në emisionin “Gjërat Tona”, duke zbuluar edhe lidhjen e tij me 40-vjeçarin.
Teksa Huta tha se do ta vriste pasi e konsideronte përgjegjës për vdekjen e të atit sepse sipas tij i kishte dhënë armën personit që kishte kryer vrasjen, Rrahman Sela ka thënë se nuk ka asnjë lidhje me akuzat që janë ngritur ndaj tij dhe se i ka duart e pastra.
“Ai e ka ditur se ku kam qenë por nuk ka asnjë të keqe nga unë. Nuk e njihja. Ta kisha parë në rrugë nuk do ta njihja. Ai ka deklaruar kot. Kur ka hyrë në lagje nuk ka njohur asnjë njeri tjetër. Vetëm mua më ka njohur. Ka pasur probleme të tjera. Nuk është marrë fare me neve. Nuk kam pasur kurrë kërcënime.
Vetëm kur e kam parë mbrëmë për këtë problem. Nuk jam i frikësuar se nuk kam bërë asgjë të keqe. I kam duart e pastra. Më erdhi keq sepse akuza është më e keqe se çdo gjë. Nuk kam qenë kurrë në polici sepse nuk kam bërë asnjë gabim”, ka rrëfyer Sela.
Më tej ai ka thënë se me Dan Hutrën është njohur që në Durrës “ku kemi qenë banorë”.
“Kur kemi ikur, nuk kam pasur asnjë lloj lidhje me të. Njihesha para 24 vitesh. Shkova nga Kruma në Durrës. Asnjë lloj lidhje nuk ka me mua. Prokuroria e Durrësit edhe e Tiranës e dinë këtë. Edhe KFOR ka qenë në atë kohë, ka ardhur edhe ka bërë kontrolle dhe nuk ka gjetur asgjë tek shtëpia ime. Kanë qenë marrëdhënie të shtëpisë së vet dhe nuk jam marrë me këtë punë. I është tiposur në mendje. Edhe ai jeton në Sharrë”, është shprehur Sela.
