Protestuesit e opozitës pritet të përballen ditën e nesërme para Kryeministrisë me të njëjtën panoramë si në protestat e mëparshme.
Përveç kordonëve të policisë që do të krijohen nga “Shqiponjat” dhe efektivë të FNSH, dyert e Kryeministrisë do të jenë sërish të blinduara.
Puna për t’i modifikuar ato në mënyrë që të mos dëmtohen gjatë ndonjë tentative të mundshme të protestuesve për të mësëyrë brenda godinës, ose duke hedhur lëndë piroteknike, ka nisur mbrëmjen e sotme.
Sakaq, pritet që protesta të nisë rreth të njëjtës orë kur zhvillohet seanca gjyqësore mbi vendimin e Apelit për “Vulën” e Partisë Demokratike.
Policia e Tiranës mesditën e së enjtes zbuloi edhe planin e masave që do të sigurojnë mbarëvajtjen e tubimit
Sipas policisë duke filluar nga ora 06:00 e datës 03.03.2023, nuk do të lejohet parkimi i automjeteve, në rrugët e poshtëshënuara:
Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
