Në protestën që shoqëria civile po zhvillon para Ministrisë së Drejtësisë një qytetar nga Hasi ka hedhur akuza të forta në drejtim të gjyqtarit Gerd Hoxha, i cili ka dhënë vendimin për lirimin nga burgu të “serial-killerit” Dan Hutra, që ekzekutoi dje në Tiranë tre gra dhe la të plagosura tre të tjera.
Qyetari e akuzon Hoxhën se i vrau për së dyti motrën kur më 29 dhjetor 2022 liroi nga burgu bashkëshortin e së ndjerës Shefqet Lika, i cili ishte arrestuar për nxitje të vetëvrasjes në dëm të bashkëshortes së tij Shahe Lika.
Shahe Lika gjeti vdekjen më 4 shtator 2022, pasi u var në një serë pranë banesës së saj në Kamëz, por bashkëshorti e raportoi si vdekje natyrale, ndërsa familjarët e së ndjerës njoftuan policinë me pretendimin se bashkëshorti i saj nuk ka treguar të vërteten.
Vëllai i të ndjerës që ndodhet në protestën para MD, konstatoi shenja rreth qafës së viktimës dhe më pas nga hetimet rezultoi se bashkëshorti i saj 56-vjeçar ka prishur vendin e ngjarjes dhe nuk ka njoftuar policinë, duke u përballur me akuzat e “shkaktimit të vetëvrasjes” dhe “veprime që pengojnë zbulimin e së vërtetës”.
Por pavarësisht kësaj sipas vëllait me vendim të gjyqtarit Gerd Hoxha, Shefqet Lika (dhunues i mëparshëm) u la i lirë nga burgu me argumentin se “ka pasur marrëdhënie të mira me komunitetin”.
“Jetën ta ka falur zoti dhe drejtësia duhet të ngushëllojë familjarët e viktimave,, Gjykatës është baras me kriminelin. Mua më kanë vrarë motrën me 4 shtator 2022. I kemi paraqitur provën prokurorisë dhe gjykatës dhe me datë 29 Dhjetor e kanë liruar nga burgu nga autori. Me motivin se ka pasur marrëdhënie të mira me komunitetin, kur në fakt marrëdhënie të mira ka pasur vetëm me alkoolin.
Shefqet Lika e vrau në bashkëpunim me motrat e veta. Ne pritëm që ato të arrestohen. Ka qenë gjyqtar po ky Gerd Hoxha. Ma ka vrarë motrën për së dyti. Jetën e ka falur vetëm zoti. Ka pasur një kod, kur hasmit i zije pritë kurrë nuk e vrisje nëse ishte i shoqëruar me një grua.
Sepse ajo është nënë. Sot bashkëpunëtor i krimit edhe drejtësia. Jeta e një njeriu vlen më shumë se jeta e Big Brother. Fokusohen te Big Brother dhe nuk fokusohen te jeta e njeriut. Populli shqiptar duhet të jetë më i ndërgjegjshëm për atë që ndodh në Shqipëri”, u shpreh vëllai i Shahe Likës në protestën e shoqërisë civile.
Sakaq, sa i përket gjyqtarit Gerd Hoxha ai “i hapi derën e burgut” killerit Dan Hutra më 16 shkurt të këtij viti, edhe pse Apeli e kishte lënë në burg më pare 40-vjeçarin e rrezikshëm për “dhunë në familje”.
Në vendimin e firmosur nga gjyqtari Gerd Hoxha që mban date 16.2.2023, thuhet se shuarja e masës së sigurisë “arrest me burg” për Dan Hutrën është bërë pasi koha e vuajtjes në paraburgim është më e madhe se vendimi i dënimit me një vit burg për akuzën e dhunë në familjes.
Për këtë arsye me një urdhër ekzektimi kërkohej lirimi i tij, në datën 16 shkurt 2023 nga paraburgimi i 313-ës në Tiranë.
Por vetëm dy ditë para se Hutra të linte qelinë, Gjykata e Apelit të Juridiksionit të Përgjithshëm i kishte rrëzuar kërkesën avokatit të tij për ndryshimin e masës së sigurisë nga “arrest në burg” në detyrim për paraqitje.
