Shqipëria është tronditur mesditën e kësaj të mërkure nga dy vrasje të njëpasnjëshme të ndodhura në Paskuqan dhe Kamëz, ku humbën jetën Mevlute Hysa (30 vjeçe), Hasime Dafku (30 vjeçe) dhe Etleva Kurti (31 vjeçe).
Por një tjetër ngjarje e rëndë është shënuar vetëm pak orë pas masakrës në Paskuqan dhe ekzekutimit ne Kamez, këtë herë në qytetin e Belshit.
Mësohet se një konflikt midis dy drejtues mjetesh ka degjeneruar në përdorimin e armëve të zjarrit.
Fillimisht konflikti ka nisur në një terminal autobusësh të linjave ndërkombëtare dhe 35-vjeçari me iniciale A.D. është përplasur për arsye konkurence me shtetasin me iniciale A.T. Konflikti ka nisur për pasagjerët që do të udhëtonin me dy linjat e ndryshme dhe vendin e parkimit.
Agjencitë e dy personave të përfshirë në konflikt transportojnë udhëtarë kryesisht në Europë dhe bëhet me dije se pas konfliktit me fjalë mes tyre, 35-vjeçari ka marrë armën dhe ka qëlluar në drejtim të autobusit.
Fatmirësisht nga sulmi me armë nuk ka të plagosur apo viktima.
Policia lokale në bashkëpunim me forcat “Shqiponja” të Elbasanit kanë arritur ta arrestojnë 35-vjeçarin pas rreth 1 orë kërkimesh.
NJOFTIMI:
Qëlloi me armë zjarri në drejtim të shtetasit A. T., për arsye konkurrence, falë reagimit në kohë të shërbimeve të Policisë dhe veprimeve të shpejta hetimore, identifikohet, kapet dhe vihet në pranga, pas 1 orë ndekjeje, 35-vjeçari.
Si pasojë e të shtënave janë shkaktuar vetëm dëme materiale në autobusin që drejtonte shtetasi A. T.
Shërbimet e Komisariatit të Policisë Cërrik, menjëherë pas marrjes së njoftimit se një shtetas kishte qëlluar me armë zjarri në drejtim të një shtetasi tjetër, kanë organizuar menjëherë punën për lokalizimin dhe kapjen e tij.
Si rezultat i reagimit në kohë të shërbimeve të stacionit të Policisë Belsh, në bashkëpunim me shërbimet e Komisariatit të Policisë Cërrik dhe shërbimet e Forcës së Posaçme “Shqiponja” të DVP Elbasan, pas një orë ndjekjeje, është bërë e mundur kapja dhe vënia në pranga e autorit të dyshuar, shtetasit A. D., 35 vjeç, banues në Belsh.
Nga veprimet e para hetimore dyshohet se ky shtetas ka qëlluar me armë zjarri në drejtim të autobusit që po drejtohej nga shtetasi A. T., për motive konkurrence (të ardhurat nga transportimi i pasagjerëve, me autobus).
Vijojnë veprimet hetimore, për zbardhjen e plotë të rrethanave të kësaj ngjarjeje.
