Safet Gjici nuk ndalet dhe duket se ka një mision madhor për zgjedhjet lokale të 14 majit, të kthejë mbrapsht kuksianët që morën arratinë me gomone, duke e braktisur kryesisht për motive ekonomike dhe mungesë infrastrukture qytetin që ai administron prej katër vitesh si kryebashkiak.
Mund të duket ironike, por vetë kryebashkiaku i Kukësit ka njoftuar se do të jetë në Londër më 4 mars, madje duke marrë me vete edhe dy rapsodë popullorë për t’i mbushur mendjen kuksianëve (të paktën atyre që jetojnë sipas legalisht) në Britani për ta votuar më 14 maj.
Gjici e njoftoi ditën e djeshme me një postim në Facebook takimin e tij në Londër, duke thënë se do të mbahet në kuadër të vijimit të turit me emigrantët kuksianë në Britaninë e Madhe dhe do të diskutohet mbi projektet zhvillimore që ai ka realizuar dhe vizionin për punët e ardhshëm që e presin Kukësin.
Pavarësisht arsyeve që ai përmend në postim, takimi tregon ndezjen e motorëve të fushatës për zgjedhjet e 14 majit, me Gjicin që s’do të privohet aspak nga “arratia” e kuksianëve (kryesisht rinisë) që mori gomonet për në Angli gjatë verës, për të përmbushur misionin e tij që është sa më shumë vota përballë demokratëve.
Me Kukësin si një bastion të djathtë dhe me PD e drejtuar nga Berisha do të jetë shumë e vështirë që Gjici të votëbesohet në krye të bashkisë, por ai duket se ka nisur “t’i kërkojë” deri në Londër ata që u larguan nga qyteti për shkak të keqqeverisjes, mungesës së vendeve të punës apo taksave të larta.
Thirrja e Gjicit për t’iu treguar vizionin e tij për zhvillim bashkëqytetarëve që rrezikuan jetën në kamionë dhe gomone për t’u larguar nga qarku me varfërinë më të madhe në vend dhe normën më të lartë të emigrimit duket një paradoks, por kryebashkiaku duket mëse i bindur në idetë e tij.
Aq sa pasditen e sotme është shfaqur në ekranin e Euronews Albania për ta mbrojtur me “argumente” fluturimin drejt Londrës.
Teksa dukej më shumë i trembur dhe në nxitim për t’u justifikuar para KQZ-së, që i konsideron shkelje të ligjit zgjedhor takimet elektorale para datës zyrtare të përcaktuar për nisjen e fushatës, Gjici tha se “askush nuk e ndalon të shkojë në Londër për të takuar kuksianët” dhe se mision ka rikthimin e tyre në vendlindje.
Këto takime, sipas Gjicit nuk janë në kuadër të fushatës elektorale. Sipas tij turi në Londër është për “t’i hapur sytë” kuksianëve, duke i treguar mbi projektet që ka bërë bashkia e tij në 4 vite, në mënyrë që ata të kthehen në Kukës për të investuar.
“Si kryetar bashkie më lind e drejta t’i takoj kuksianët kudo që janë pa nisur edhe fushata zyrtarisht, takimet i kemi raportuar edhe në KQZ. Do shkojmë edhe në vende të tjera jo vetëm në Londër, nuk më ndalon askush të takoj kuksianët kudo që janë. Ne kërkojmë që të na ndihmojnë për investime. Do vijë një ditë që kuksianët do kthehen. Ka shumë që janë kthyer duke investuar në vendin e tyre. Duke krijuar kushte më të mira në infrastrukturë, më shumë kuksianë do të kthehen”, tha Gjici.
LEXO EDHE:
Kuksianët morën arratinë me gomone, Safet Gjici niset t’i kërkojë në Angli për vota
