Më datë 16 shkurt, familjarët e 4 viktimave të “21 janarit” bënë një kallëzim të ri në SPAK për ish-kryeministrin Sali Berisha, ish-ministrin e Brendshëm Lulzim Basha, ish-komandantin e Gardës së Republikës, Ndrea Prendin dhe ish-gardistin Agim Llupo.
Në kallëzimin e firmosur nga familjet e Aleks Nikës, Hekuran Dedës, Faik Myrtajt dhe Ziver Veizit akuzohen 4 të sipërpërmendurit për veprën penale “vrasje me dashje të disa personave, të kryer nga një organizatë kriminale nga persona me funksione të larta shtetërore”.
Në kallëzimin e paraqitur, familjet Nika, Deda, Veizi dhe Myrtaj kanë renditur dhe provat që duhet të administrojë SPAK, mes tyre dhe audio-përgjimin e komunikimeve të Gardës së Republikës, gjatë operacionit të kundërpërgjigjes me armë zjarri ndaj demonstruesve para Kryeministrisë 12 vite më parë.
Familjarët e viktimave janë kategorikisht kundër një hetimi nga Prokuroria e Tiranës, pasi e cilësojnë organin e akuzës si të paaftë për të çuar të vërtetën deri në fund.
Kërkesa e tyre ka marrë përgjigje këtë të martë, me një letër që kreu i SPAK, Altin Dumani u ka dërguar dhe ku nënvizon se Prokuroria e Posaçme ka shpallur moskompetencën për kallëzimin.
Dumani shpjegon të gjitha arsyet përse institucioni që ai drejton ia ka kaluar edhe kallëzimin e dytë Prokurorisë së Tiranës.
