Analisti i njohur Fatos Lubonja, teksa analizonte situatën politike në vend në studion e News24 denoncoi kryeministrin Edi Rama se ka shfaqur pikturat e tij në një ekspozitë në Firence, e cila është në pronësi të vëllait të një prej biznesmenëve të ndërtimit që përfitojnë lejet për të ngritur kulla në Tiranë.
Teksa u pyet në lidhje me ekspozitën e Ramës në Hong Kong, mbi të cilën janë ngritur një sërë akuzaash nga opozita, Lubonja u ndal te arkitekti italin Marko Casamonti, të cilit shefi i qeverisë përveç kullave i besoi edhe ndërtimin e stadiumit “Air Albania”.
Sipas analistit, Rama ka ekspozuar disa nga pikturat e tij në galerinë që vëllai i arkitektit fiorentin Roberto Casamonti zotëron, e quajtur “Tornabuoni Arte”.
“Që Rama bashkë me punën si kryeministër shitet si piktor në botë, e thotë hapur, por për fat të keq artin e ka bërë kur u bë kryeministër dhe ato i bën jashtë vendit, nuk hap ekspozita këtu dhe të ftojë njerëzit t’i shohin. Normalisht të gjithë artistët ekspozojnë në vendin e tyre. Kjo është një shoë, ai kënaq egon e tij personale të pushtetit duke abuzuar me pushtetin. Kjo është një nga ekspozitat. E keni parë Casamontin që ndërton kulla këtu, vëllai i tij në Firence ka një galeri arti ku ekspozon Rama. Ka apo jo konflikt interesi këtu? Vëllai i atij që ka ekspozitën ku del Rama ndërton kulla në Tiranë. Ky ka pafund abuzime të tilla”, u shpreh Lubonja.
Sa i përket çështjes “McGonigal” dhe mocionit me debat në lidhje me të, Lubonja tha se në këtë skandal duhet që brenda PS-së “të tronditeshin disa koshienca”.
Referuar korruptimit të ish-agjentit të FBI-së, Lubonja nënvizoi se minimalisht duhet të kishte një komision hetimor parlamentar, ndërsa e cilësoi shqetësues faktin që kreu i ekzekutivit blen njerëz për të shkatërruar opozitën dhe mendimin ndryshe.
“Mua më shqetëson se ne jetojmë dhe e dimë se si është e vërteta, edhe pse nuk i kemi provat konkrete. Edi Rama ka lobuar në FBI për të luftuar opozitën, dhe që blen njerëz brenda e jashtë vendit në vend që të bëjë punë të mira. Punët e mbrapshta të tij e kanë çuar vendin në këtë gjendje. Në këtë skandal ata të gjithë e dinë, edhe ata vetë. Ky është një skandal me përmasa të tilla që disa koshienca në PS duhet të tronditeshin. Të korruptosh deri te FBI është shumë. Këta tani thonë që nuk janë të vërteta. Nënkuptimi është që kjo është një shpifje dhe do gjejnë një të vërtetë për opozitën”, deklaroi ai.
“Unë gjykoj se duhet të kishte një komision hetimor parlamentar përveç të tjerave. Jemi midis asaj që pretendojmë sikur jemi në demokraci dhe një realiteti ku këta bëjnë si të duan në një tirani të mazhorancës që nuk lejon as debat e asgjë. Do prodhojë zhurmë debati por nuk pres të sqarojë publikun. Ato do vijnë nga Amerika. Këta mohojnë edhe provat nga Amerika”, shtoi më tej analisti.
