Dy persona janë arrestuar ditën e sotme në Krujë dhe Lezhë për organizim të basteve sportive.
Në Krujë ka rënë në pranga një 33-vjeçar, pasi kishte përshtatur lokalin për organizim të lojarëve të fatit. Po ashtu u arrestua një 30-vjeçar në Lezhë, i cili po ashtu kishte përshtatur lokalin e tij për organizimin e basteve sportive.
Policia ka sekuestruar 2 makineta, tavolinë, çipsa, për lojën e pokerit dhe 1 aparat celular.
“Shërbimet e Komisariatit të Policisë Krujë, në kuadër të operacionit policor të koduar “Fundi i lojërave”, mbështetur dhe nga inteligjenca informative, kanë vijuar kontrollet në lokale dhe në ambiente të tjera në të cilat dyshohet se organizohen lojëra fati në kundërshtim me ligjin. Si rezultat, specialistët për Hetimin e Krimeve të Komisariatit të Policisë Krujë arrestuan në flagrancë shtetasit: -G. H., 30 vjeç dhe G. M., 33 vjeç, banues në Krujë dhe në Lezhë, për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”.
Shtetasi G. M. u kap në flagrancë nga shërbimet e Policisë, në lokalin që administronte, të cilin e kishte përshtatur për lojëra fati. U sekuestruan në cilësinë e provës materiale, 2 makineta për lojëra fati, tavolinë dhe çipsa për lojën e pokerit, të cilat u gjetën në këtë lokal. G. H., 30 vjeç, pasi u kap në flagrancë nga shërbimet e Policisë, në lokalin që administronte, duke vënë baste sportive, me aparat celular, i cili sekuestrua në cilësinë e provës materiale.”-njofton policia.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.
