Në kuadër të fushatës elektorale për zgjedhjet lokale të 14 majit, kandidati i opozitës për Bashkinë e Tiranës, Belind Këlliçi ka zhvilluar një takim me banorët në Farkës dhe Petrelës.
Gjatë takimi, Këlliçi është shprehur se programi i demokratëve për kryeqytetin do të jetë i orientuar drejt zgjidhjeve afatshkurtra.
“Do të rikthehemi me një paketë zgjidhjesh afatshkurtra. Nëse kryebashkiaku nuk realizon objektivat brenda 4-vjeçarit, dënojeni me votë”, theksoi ndër të tjera, Belind Këlliçi.
Reagimi i plotë nga Belind Këlliçi:
“Takime në Farkë e Petrelë. Faleminderit të zotëve të shpisë që na pritën krahëhapur!
Dëgjojmë nga njëri-tjetri të ngrihen çështje me vlerë, për të cilat unë dhe ekipi im do të rikthehemi me një paketë zgjidhjesh.
Programi ynë do të jetë i orientuar drejt zgjidhjeve afatshkurtra.
Një kryebashkiak i mirë duhet të marrë përsipër të realizojë objektivat brenda 4-vjeçarit, përndryshe dënojeni me votë.
Premtimet përtej afateve të mandatit janë gjepura dhe humbje kohe për Tiranën!”
