Largimi i mjekëve dhe inferemierëve drejt vendeve të Bashkimit Europian (kryesisht drejt Gjermanisë) dhe fakti që qindra studentë të Universitetit të Mjekësisë nisin studimet me synimin për t’u punësuar më pas larg Shqipërisë, është një nga “plagët” më të rënda të vendit tonë aktualisht.
Organizatat ndërkombëtare e kanë nxjerrë vazhdimisht në pah problemin nëpërmjet raporteve të tyre, por shifrat tregojnë që epidemia e braktisjes së sistemit shëndetësor duket thuajse e pamundur për t’u ndalur, për shkak edhe të pagave të larta që ofrojnë vendet e BE-së.
Rroga dhe kushtet e punës duket se nuk e favorizojnë aspak Shqipërinë për të mbajtur në vend ajkën e mjekësisë dhe sipas Federatës së Mjekëve Shqiptarë në Evropë në 10 vitet e fundit numërohen 3.800 mjekë shqiptarë që i janë drejtuar vendeve të bllokut.
Por, sikur të mos mjaftonte kjo mjekësia shqiptare po merr një tjetër goditje që lidhet pikërisht me braktisjen e sistemit. Kjo sepse, pas mjekëve e infermierëve, edhe farmacistët kanë nisur të largohen nga vendi.
Sipas të dhënave zyrtare të Urdhërit të Farmacistit, vetëm në 2022 janë larguar 75 profesionistë të fushës.
Kryetarja e urdhërit, Diana Toma shprehet se ky fenomen shumë shpejt do të na çojë në mungesë profesionistësh në këtë shërbim.
“Për hir të së vërtetës quhet masiv referuar numrit të farmacistëve që e ushtrojnë profesionin dhe atyre që po largohën. Nëse për disa vite po të vazhdojnë me këto ritme largimi do jemi para mungesës së personelit që do të na ofrojmë shërbim farmaceutik. Nëse me parë ishim në raportin iknin 1, 2 dhe 8 mbeteshin, vajtem në raportin që 5 mbeten dhe 5 iknin. Aktualisht jemi në raportin më shumë se 5 ikin më pak se 5 mbeten”, tha Toma.
Sipas saj, Shqipëria është në një situatë kur mund të themi me plotë gojë se kriza për gjetjen e profesionistëve të barnave ka nisur.
“Nuk gjen farmacistë për t’i plotësuar, dhe kur garantojnë me profesionistë njërin turn, kanë probleme të mbulojnë turnin tjetër”, tha ajo.
Aktualisht në të gjithë vendin numërohen rreth 3 mijë farmacistë. Kjo shifër ka mbetur e pa ndryshuar për të pakën 3 vitet e fundit, si pasojë e largimeve.
