Edukimi i nxënësve në shkolla në Shqipëri duket se është shndërruar në një mision thuajse të pamundur.
Institucionet arsimore që duhet të prodhojnë modele për një shoqëri kanë humbur misionin e tyre primar dhe nxënësit, duke nisur nga shkollat 9-vjeçare e duke vijuar te gjimnazet, janë kthyer në arena që prodhojnë skena dhune dhe banaliteti.
Pas videos skandaloze që tregonte dhunimin kafshëror nga një grup bashkëmoshataresh të një nxënësesje të shkollës 9-vjeçare “Kongresi i Manastirit” në Tiranë, një tjetër video me përmbajtje të rëndë po qarkullon sot në rrjet.
Këtë herë JOQ ka publikuar pamjet, ku shihet një grup nxënësish gjimnazistë, që po ashtu dhunojnë pa mëshirë bashkëmoshataren e tyre.
https://www.youtube.com/shorts/RKo2Uz5D8Vs?feature=share
Teksa disa djem e vajza e tërheqin zvarrë dhe e mbajnë të palëvizur personin që dhunohet, në sfond shihet një vajzë bjonde që sipas denoncuesit quhet Ana, e cila e godet vazhdimisht moshataren e saj në kokë me shkelma.
Përmbajtja e videos është tepër e rëndë, pasi në sfond dëgjohen rënkimet e vajzës së që po dhunohet barbarisht.
Sipas denoncimit, ngjarja ka ndodhur në Tiranë më 22 shkurt. Qytetari në denoncimin për JOQ shprehet se vajzat janë konfliktuar për një djalë, pasi njëra prej tyre komunikonte më të dashurin e vajzës tjetër.
Raste të tilla që përsëriten thuajse cdo muaj tregojnë se shkollat në vend janë kthyer në institucione ku ngre krye dhuna dhe jo mirësjellja e virtytet e një shoqërie të denjë.
Sherret mes nxënësve, nxënës që ofendojnë mësues, mësues që ofshajnë dhe dhunojnë nxënës, janë ndodhi të rëndomta që shfaqen herë pas here, duke ngritur shpesh pikëpyetje nëse shkolla e ka humbur misionin e saj.
Zotimet e policisë ndërkohë, për shtimin e efektivëve në mënyrë rritjen e sigurisë në institucionet arsimore kanë rezultuar propagandë.
