Drejtoria e Përgjithshme e Tatimeve nëpërmjet një njoftimi për mediat, u ka dërguar një mesazh të qartë biznesve se do të ndëshkohen penalisht, në rast se konstatohen se kanë ndërhyrë duke ulur deklaratën e listëpagesave, ose kanë anuluar faturat e shitjes, ndërkohë që ato mbeten në fuqi te blerësi.
“Kush ndryshon me ulje deklaratën e listpagesës dhe anulon faturat e shitjes pa u reflektuar në librat e blerjes do të ndiqet penalisht. Administrata Tatimore njofton të gjithë Tatimpaguesit se ka konstatuar 2 fenomene me risk të lartë:
1- Tatimpagues, që bëjnë ndryshime me ulje të deklaratës së listëpagesës, me qëllim shmangien e pagesës së kontributeve të sigurimeve shoqërore dhe shëndetësore për punëmarrësit;
2- Tatimpagues, që anullojnë faturat e deklaruara të shitjes, pa u reflektuar këto anullime në Librat e Blerjes së klientëve të tyre”, thuhet në konstatimin e DPT.
Ndërkohë më tej nënvizohet se Administrata Tatimore po investigon nëse në skemat e shmangjes së taksave janë përfshirë edhe punonjës të strukturave të saj, të cilët po ashtu do të trajtohen sipas ligjit “Për Procedurat Tatimore”.
“I bëjmë me dije të gjithë tatimpaguesit se këto ndryshime të pajustifikuara të deklaratave, kryesisht ndryshimi i deklaratës së listpagesës, cënojnë drejtpërdrejt jo vetëm Administratën Tatimore, por edhe Pensionin dhe Shërbimet Mjekësore të punëmarrësit dhe në bazë të ligjit konsiderohet vepër penale”, sqaron Administrata Tatimore.
