Situata politike në vend mbetet e ngarkuar me tension, në një kohë thuajse gjysma e deputetëve të Partisë Demokratike janë përjashtuar nga Këshilli i Etikës në Kuvend dhe opozita ka paralajmëruar protesta të vazhdueshme para Parlamentit.
Brenda një muaji, 23 deputetë të opozitës që në disa seanca radhazi kanë kërkuar ballafaqimin e kryeministrit Edi Rama me pyetjet e tyre për lidhjet me ish-agjentin e FBI-së, Charles McGonigal, janë penalizuar me masa disiplinore.
Së fundmi, Sekretariati vendosi që deputetët Edmond Spaho, Oerd Bylykbashi, Elda Hoti dhe Sorina Koti nuk do të lejohen në seancë për 10 ditë, ndërsa Lindita Metaliaj është përjashtuar për 5 ditë dhe Greta Bardeli për 3 ditë.
E gjithë kjo situatë e krijuar vetëm 9 ditë para protestës kombëtarë të 3 Marsit, për të cilën Sali Berisha kërkoi dje nga demokratët që të shkojnë derë më derë dhe të mobilizojnë qytetarët, duket se ka vënë në lëvizje të plotë opozitën.
Kreu i PD nuk po humb kohë për organizimin e protestës dhe reagimin përballë kërkesave të socialistëve për të përjashtuar sa më shumë deputetë demokratë, dhe për këtë ka thirrur sot një mbledhje të Grupit Parlamentar, vetëm 24 orë pasi dha direktivat në mbledhjen e Kryesisë.
Mbledhja e Grupit do të mbahet në orë 13:00, në sallën ‘Azem Hajdari’ dhe pritet që të diskutohet edhe plani i veprimit për protestën e radhës para Kuvendit, që do të zhvillohet në të njëjtën orë me seancën e nesërme plenare.
Me anë të një njoftimi në Facebook, Berisha bën me dije se edhe nesër opozita mban protestën e radhës në orën 10:00 para Kuvendit.
