Personi që shihni në foto është 37-vjeçari shqiptar Pëllumb Islami, i cili humbi jetën tragjikisht duke mbetur viktimë aksidentalisht pas një sherri ku u përdorën armët mes dy grupeve shqiptarësh në një lokal në “Nea Joni” të Athinës.
I thirrur nga të gjithë që e njihnin si Sandri, shqiptari u identifikua në spital nga i vëllai dhe sipas informacioneve ishte me profesion hidraulik.
Sa i përket ngjarjes, të shtënat me armë u regjistruan në orët e vona të mbrëmjes brenda një kafeneje në Nea Joni, ku 37-vjeçari kishte shkuar të shihte një ndeshje futbollit.
Fatkeqësisht ai ndodhej në vendin e gabuar dhe në kohën e gabuar. Që në momentin e parë u kuptua se viktima nuk kishte asnjë lidhje me dy grupet e bashkëatdhetarëve të tij që qëlluan mbi njëri-tjetrin me armë zjarri brenda kafenesë.
Dy grupet me nga 4 dhe 3 anëtarë respektivë sipas mediave greke u ulën në një nga tavolinat VIP të kafeterisë dhe pak përpara se kamarierja t’i shërbente, njëri nga burrat nxori një armë dhe filloi të qëllonte.
Të paktën një nga plumbat ka goditur në shpatull hidraulikun 37-vjeçar, i cili pak kohë më vonë ka ndërruar jetë nga gjakderdhja e pakontrolluar.
Siç zbulon neësit.gr, autorët janë banditë “me emër” që veprojnë në qendër të Athinës. Konkretisht bëhet fjalë për banda shqiptarësh që merren me trafikun e drogës dhe “shesin” mbrojtje përkundrejt dyqaneve në zonën e Karaiskakis dhe sheshit Agios Pavlos për t’i ruajtur nga gjobvënësit.
Banda përdorte të paktën tre makina luksoze. Në fakt, menjëherë pas të shtënave, ata lanë të parkuar jashtë kafeterisë një makinë tip “Cadillac Jeep” e zezë dhe janë larguar me një “Mercedes” ngjyrë gri, të cilat më pas u zbuluan se ishin marrë me qira në një zyrë në Athinë.
