Mbrëmjen e djeshme, sherri mes dy grupeve shqiptare të përbëra nga 4 dhe 3 anëtarë respektivisht, ku u përdorën armët e zjarrit, i mori jetën me një plumb qorr një bashkëkombësi të tyre, që kishte dalë të shihte një ndeshje futbolli në “Nea Joni” të Athinës.
Përplasja me armë ndodhi në një lokal shumë të frekuentuar nga qytetarët në këtë zonë të kryeqytetit helen dhe njëri prej tyre ka qëlluar 9 herë me armë, me njërin prej plumbave që përshkoi në shpatull 37-vjeçarin Pëllumb Islami, nga Delvina.
Viktima, që ndërroi jetë në spital nuk kishte asnjë lidhje me personat në fjalë, por ishte duke parë ndeshjen në një prej tavolinave ngjitur, së bashku me shokët e tij. Ai punonte si hidraulik në shtetin helen, ndërsa ka qenë vëllai i tij i cili e ka identifikuar Përllumbin në morg.
Sakaq mediat greke kanë publikuar detaje të reja lidhur me ngjarjen. Ato raportojnë se 7 shqiptarët kanë mbërritur në kafenenë në “Nea Joni” me tre makina luksoze.
Ata kanë hyrë së bashku në dyqan, por papritmas kanë filluar të grinden dhe sherri është transferuar jashtë lokalit. Menjëherë pas përgjakjes së lokalit, autorët janë arratisur me një makinë luksoze me ngjyrë të argjendtë.
Pak minuta pas të shtënave nga të cilat mbeti i plagosur për vdekje 37-vjeçari hidraulik shqiptar, grupi i autorëve hipi në mjetin luksoz dhe u largua drejt rrugës së Kymit.
Në videon e siguruar nga Protothema.gr, automjeti me shpejtësi të lartë shihet në momentin e arratisjes pak metra larg kafenesë ku ndodhi ngjarja e përgjakshme.
Më pas pak para mesnate mjeti është duke lëvizur në rrugën Kastamonis, në drejtim të Avenue Kymi. Sipas informacioneve, automjeti me të cilin u arratisën autorët u gjet në orët e para të mëngjesit në zonën e Gyzit dhe është dërguar për ekspertizë në laboratorët e mjekësisë ligjore.
Policia greke ndërkohë ka identifikuar katër nga 7 “të fortët” që u përfshinë në sherrin e rëndë me një viktimë.
Njëri prej tyre është Erlis Salaj, i akuzuar si kreu i bandës së shqiptarëve.
Sipas policisë greke, Salaj ka qenë i pranishëm gjatë sherrit në lokalin që ndodhi incidenti, së bashku me Julian Qose dhe 5 persona të tjerë.
Sipas policisë helene, deri tani janë identifikuar dy personat e sipërpërmendur, ndërsa po punohet për identifikimin e personave të tjerë që ndodheshin në lokal.
Policia greke sqaron se Salaj dhe Qose janë në kërkim si persona që kanë dijeni për ngjarjen, por ndaj tyre ende nuk ka akuzë për vrasjen e Islamit.
Ndërkohë ka dyshime se 7 shqiptarët e përfshirë në ngjarje janë arratisur në Shqipëri, për t’i shpëtuar policisë helene.
Autoritetet greke janë në vënë në kërkim të personave që janë pjesë e dy bandave, të dyja shqiptare dhe rivale me njëra-tjetrën, ndërsa njihen si persona me rrezikshmëri tepër të lartë.
Ata dyshohet se janë të përfshirë në trafikun e drogës, të qenieve njerëzore, si dhe gjobëvënie, ndërsa aktivitetin e tyre e bazojnë kryesisht në qendër të Athinës, ku disa prej tyre janë edhe pronarë të një klubi nate me seli në Sepolia.
Ndërkohë, sipas informacioneve të transmetuara nga Vassilis Lambropulos në emisionin “Live News”, pronari i kafenesë ku u qëllua me armë dhe humbi jetën 37-vjeçari, është babai i 16-vjeçarit i cili u godit me thikë nga katër persona në Patisia për t’i vjedhur celularin.
Ngjarja ka ndodhur herët në mbrëmjen e së hënës (20.02.2023), kur 16-vjeçari kishte dalë për shëtitje me një shok.
Katër personat i bllokuan dhe i kërkuan 16-vjeçarit t’i dorëzonte celularin. Kur ai ka rezistuar, grabitësit e kanë goditur me thikë në gjoks, kofshë dhe shpinë.
https://youtu.be/DSNVbP3uY9M
Fëmija ka kërkuar ndihmë nga kalimtarët e rastit dhe është dërguar në spital, ku iu nënshtrua një operacioni.
Sipas raportit të Vassilis Lambropulos, policia po heton nëse dy incidentet kanë lidhje, por deri më tani nuk ka ndonjë të dhënë që i lidh.
