Jurgen Klop ka pranuar se Real Madrid mori atë që deshi përballë skuadrës së tij me fitoren 5-2 ndaj Liverpulit në ndeshjen e parë mes dy skuadrave në Ligën e Kampioneve. Por trajneri gjerman, edhe pse kritikoi lojtarët e tij se ia dhuruan ndeshjen madrilenëve, ka lëshuar dorashkën e sfidës, duke theksuar se ekipi do të tentojë të shkojë në Madrid për të fituar pas tre javësh.
“E pamë që ishte një super nisje, një super ndeshje. Kishim gjithçka që na duhej, shumë njerëzve iu kujtuan disa nga paraqitjet tona më të mira, ishim 2-0 në avantazh duke ndjerë një atmosferë të jashtëzakonshme. Pastaj erdhi ky momenti ku kishim 4-5 lojtarë rrotull dhe Vinicius mundi të finalizonte gjithsesi dhe topi shkoi në trekëndësh. Padyshim është një gol i klasit të lartë dhe duhej ta mbronim më mirë, padyshim, më shpejt, dikush duhet të shkonte ta mbyllte.
Ishim pak pasivë në ato momente dhe nuk ishte mjaftueshëm mirë për ne. I dyti nuk ishte as një mundësi shënimi, ishte një goditje e keqe dhe e pranojmë, por përsëri kishim mundësi në pjesën e parë, ndonëse pësuam dy gola. Deshëm të bënim të njëjtën lojë në pjesën e dytë, që të luftonim ndaj tyre, por sapo dolëm, me situatën e parë pësuam golin e 3-2. Nuk di të them me siguri se ishte faull, në ato momente, por ku ka goditje dënimi, duhet të mbrohesh më mirë. Nuk ka mundësi që të ketë atë hapësirë aty, por ndodhi dhe ajo ishte goditja e vërtetë.
Mund ta shihje në fushë që ata kishin ndeshjen që deshën që në fillim, ne nuk ishim më të qartë, humbëm saktësinë që kishim. Nuk më kujtohet një pasim i mirë kur Nunjez dilte pas mbrojtjes. Ishte një ndeshje ndryshe.
