Një situatë kaotike e paprecedentë u krijua në qytetin e Lushnjes, kur firma e pastrimit të qytetit, pasi bashkia i hoqi kontratën e pastrimit, tërhoqi koshat e plehrave, dhe pse më parë ishte dakordësuar me Bashkinë që t’i linte ato derisa të zëvendësoheshin.
Por, menjëherë me prishjen e kontratës, përfaqësuesit e firmës dhe punëtorët e saj, jo vetëm tërhoqën koshat, por plehrat që ishin nëpër kosha i derdhen në rrugë.
Siç tregohet edhe në këtë video që ka publikuar deputeti i PD së Lushnjes, Saimir Korreshi. I cili ka ngritur zërin për situatën alarmante e për ndotjen e qytetit, por ka kërkuar zbatimin e ligjit.
“Pasi u moren leket taksapaguesve Lushnjare ua lane plehrat ne dere. Ndonje gjobe i vuri ndokush qe i zbrazen koshat neper lagje ??“, shkruan Korreshi teksa publikon videon me poshte.
Situata e paprecedentë është zgjidhur menjëherë nga ana e kryetares së bashkisë Eriselda Sefa që ka hyrë në komunikim me autoritetet dhe ka shpërndarë koshat e rinj në qytet. Tanimë, priten veprime të mëtejshme të autoriteteve të bashkisë për të penalizuar firmën me dëmin e kryer.
