Një rrjet ndërkombëtar trafiku që prostituonte vajza të reja nga Amerika Latine në Greqi u godit këtë të shtunë në Athinë, duke çuar pas hekurave 8 persona, mes të cilëve 6 tutorë shqiptarë.
Mediat greke bënë me dije në mesditë se fillimisht vajzat kanë ardhur në Greqi nga rrjeti kriminal i cili u mbulonte shpenzimet dhe janë mashtruar duke u thënë se do të punonin si eskorat VIP, por më pas janë mbajtur peng në një hotel.
Vajzat mbaheshin në kushte të mjerueshme dhe gjithmonë ju duhej të merrnin leje për të dale, duke qënë gjithmonë të shoqëruara nga tutorët.
Ka qenë një viktimë e cila ka kontaktuar policinë në numrin 112 dhe ka denoncuar hotelin. Por duket se deri sa policia mbërriti në hotel, trafikantët kishin marrë informacion për kontrollin, duke larguar viktimat nga godina.
Hetimet kanë nisur që në muajin shtator, duke u konkluduar sot me arrestimin e tyre.
Sakaq, në mbrëmje Protothema ka zbuluar edhe hotelin ku janë mbajtur vajzat e shfrytëzuara për prostitucion nga banda e shqiptarëve.
Bëhet fjalë për një hotel të ndodhur në Syggrou Avenue, që ishte shndërruar në “burg” për gratë viktima të rrjetit ndërkombëtar të trafikut.
Në dhomat e tij tutorët mbyllnin takimet me klientët duke detyruar vajzat e reja nga vendet e Amerikës Latine të kryenin marrëdhënie seksuale me ta kundrejt një pagese të lartë.
Policia gjeti më shumë se 15 vajza, nga Kolumbia, Venezuela, Brazili dhe Maroku, të burgosura në hotelet e përdorura nga grupi i tutorëve.
Ata i reklamonte shërbimet e vajzave përmes një faqe interneti rozë dhe takimet u organizuan nga call-centeri i drejtuar nga tre gra.
62-vjeçarja, pronare e hotelit në Syngru ka pritur vajzat dhe ka siguruar hapësirë për takime seksuale me një pagesë të lartë.
Sipas informacioneve bëhet fjalë për një biznesmene të njohur aktiv në fushën e argëtimit me restorante të kuzhinës etnike në Glyfada dhe Gazi.
