Policia Federale e SHBA (FBI) po heton një shkelje të rrjetit të saj kompjuterik.
“FBI është në dijeni të incidentit dhe po punon për të marrë informacion shtesë”, thuhet në deklaratën e dërguar Reuters, pa një shpjegim.
Rrjeti televiziv amerikan CNN, tha se zyrtarët e FBI besonin se ai përfshinte kompjuterë në zyrat e agjencisë në Nju Jork që përdoreshin për të hetuar rastet e shfrytëzimit seksual të fëmijëve. Aktualisht është e paqartë se kur ka ndodhur shkelja. Një burim i tha CNN se origjina e saj është ende duke u hetuar.
Në dekadën e fundit, ka pasur disa sulme kibernetike ndaj shërbimeve amerikane. Në fund të vitit 2020, zyrtarët zbuluan një operacion të gjerë të spiunazhit kibernetik në disa rrjete federale nga hakera të lidhur me shërbimet e inteligjencës ruse. Në vitin 2015, Zyra e Menaxhimit të Personelit (OPM) gjithashtu njoftoi se rrjeti i saj ishte shkelur dhe të dhënat e punonjësve federalë ishin vjedhur. Më vonë ia atribuan sulmin hakerave kinezë.
