Ulja e buxhetit që qeveria do të shpenzojë për sportin në 2023 dhe për më tepër ndarja sipas sistemit të pikëzimit që Ministria e Arsimit dhe Sportit ka përcaktuar 1 miliardë e 494 milionë lekë të vjetër që do shpërndahen në 17 federata të shumësportëshit, ka nxitur reagime të forta.
Formula e pikëzimit ka sjellë shumë debate në vitet e fundit pasi edhe vetë federatat janë të paqarta për mënyrën e aplikimit të saj, por reagimi më i ashpër ka ardhur këtë të enjte nga atletja Luiza Gega.
Gega kërkon një rishikim të kësaj formule, që do duhej të ishte sipas rezultateve të arritura dhe medaljeve në secilën disiplinë, duke i dërguar një mesazh të drejtëpërdrejtë ministres Evis Kushi.
Mungesa e fondeve gjithashtu duket se shqetëson Gegën, pasi buxheti ka zbritur në 1 miliardë e 494 milionë lekë të vjetër, një diferencë e madhe me 1.8 miliardë që ka qenë vitin e kaluar, dhe për më tepër është i shpërndarë në dy këste.
“Sinqerisht, kam vërtet përshtypjen që ministrja Evis Kushi s’ka dijeni për këtë logjikën e ndarjes së këtij buxheti. Shpresoj që ta shikojë sa më shpejt. Personalisht si sportiste elitare nuk kam ndonjë interes sado që të jetë buxheti i Federatës por duke qenë se ai ndahet nga performanca që kanë pasur sportistët vitin e kaluar, ndihem e ofenduar që Federatës sime, në vend që t’i ngrihej buxheti, përkundrazi, i është ulur dhe disa Federatave të tjera, ku me gjithë respektin kur ta meritojnë”, shkruan Luiza Gega në rrjetet sociale.
