Në mbledhjen e grupit që zhvilloi pak para nisjes së seancës plenare të kësaj të hëne që do të shoqërohet edhe me një protestës të opozitës jashtë ambienteve të Kuvendit, kreu i PD, Sali Berisha bëri thirrje për një betejë të fortë.
Sipas tij, protesta para parlamentit është thirrur për të mbrojtur interesat e qytetarëve që kanë votuar opozitën, zëri i të cilëve do të dëgjohet brenda dhe jashtë këtij institucioni.
“Ne në parlament do të bëjmë një betejë të fortë. Nuk mund të ecet siç është ecur. Ligjet tona nuk lexohen në parlament. Nuk po them që nuk miratohen, por leximi, shqyrtimi është detyrim kushtetues, është detyrim i yni para atyre që na kanë besuar, që presin të jemi zëri i tyre në parlament”, tha Berisha.
Pavarësisht faktit se PD akuzon kryetaren e Parlamentit Lindita Nikolla dhe kryeministrin Rama se po përdorin çdo formë për të ndalur opozitën në Kuvend, Berisha tha se do opozita nuk do t’i shmanget misionit të saj.
“Një njeri, kryetarja e parlamentit vendos gjithçka në kundërshtim me rregulloren dhe ligjin. Sot është thirrur një protestë tek parlamenti, zëri ynë do të jetë brenda parlamentit, jashtë parlamentit. Nuk kemi asnjë qëllim përveç se një thirrje për çdo qytetar shqiptar, një apel, kushtrim se në këtë parlament sot nuk respektohet asnjë e drejtë e opozitës. Se ky parlament bën gjithçka që opozita ta bojkotojë atë, por opozita nuk e bojkoton parlamentin, do të bëjë gjithçka për të mbrojtur interesat e qytetarëve dhe atyre që e kanë votuar”, deklaroi ai.
