Orë pas ore zemërimi kundër Rexhep Tajip Erdogan po rritet në Turqi, për shkak të mos reagimit në kohë të instancave shtetërore për të gjithë të prekurit nga dy tërmetet 7.8 dhe 7.6 ballë që goditën vendin.
Duket se reagimet e qytetarëve në zonat e prekura nga tërmeti tashmë po e pluhurosin narrativën që presidenti turk ndërtoi vitet e kaluara për një Turqi të… të fortë dhe të begatë.
Edhe ditët e mëparshme shpërtheu një valë zemërimi kundër zyrtarëve qeveritarë që vizitonin zonat e rrafshuara nga tërmeti. Në shumë raste të goditurit nga tërmeti nuk i miratuan fjalët e ministrave që i vizituan dhe i pritën ftohtë ata.
Mirëpo, përderisa mosreagimi i instancave shtetërore në Turqi vazhdon dhe populli mbetet në thelb i pafuqishëm, zemërimi po i drejtohet gjithmonë e më shumë drejtpërdrejtë Erdoganit.
Një video e regjistruar nga kamera televizive dhe transmetuar nga televizionet, nga zona e Hatay është e vërteta e frikshme për pushtetin e Erdogan.
Një burrë që humbi nënën e tij nga tërmeti vdekjeprurës tregon në kamera gruan e vdekur që për të tetën ditë rresht ka mbetur e bllokuar nën rrënoja dhe askush s’ka ardhur ta nxjerrë prej aty.
“Për hir të Zotit, kushdo që ka një grimë ndërgjegje le të shikojë këtu. Ajo është në këtë gjendje që nga e hëna, ka ndërruar jetë të martën. Mjaft. Po sikur kjo të ishte nëna juaj Rexhep Tayyip Erdogan? Çfarë ndodhi me liderin botëror (që ju thoni se jeni)? Ku jeni? Ku?“, thotë i zemëruar qytetari turk.
