Kandidati i PD-së për Bashkinë e Elbasanit në zgjedhjet e 14 majit, Luçiano Boçi ka dënuar neglizhencën e institucioneve të arsimit duke i lënë nxënësit pa ngrohje në ditët më të ftohta të vitit.
Boçi shprehet se është kriminale që një fëmijë 10 vjeçar të qëndrojë me doreza dhe kapuç në orën e mësimi.
“Është e pakonceptueshme se si një mësues të përpiqet t’i shpjegojë mësimin një fëmije që dridhet nga i ftohti! Boll me pangopësinë tuaj për të vjedhur në gjithçka.”- shkruan Boçi në një postim në Facebook.
Postimi i plotë:
Kriminale neglizhenca me fëmijët në shkolla!
Ndihem i keqardhur të marr çdo ditë mesazhe nga prindërit e nxënësve në shkolla të ndryshme në qytet por sidomos në fshatrat e Elbasanit. Me një papërgjegjshmëri të plotë morale dhe institucionale në ditët më të ftohta të vitit, Bashkia Elbasan i ka pamundësuar ngrohjen pjesës më të madhe të institucioneve arsimore në Elbasan.
Është kriminale që një fëmijë 10 vjeçar të qëndrojë me doreza dhe kapuç në orën e mësimit! Është e pakonceptueshme se si një mësues të përpiqet t’i shpjegojë mësimin një fëmije që dridhet nga i ftohti!
Boll me pangopësinë tuaj për të vjedhur në gjithçka! Siguroni kushtet optimale që fëmijët dhe adoleshentët në të gjithë territorin e Elbasanit të kenë ngrohje dhe të vijojnë mësimin normalisht!
