Një herë tjetër u raportua i vdekur, më pas i shpëtuar i gjallë me lëndime vetëm në këmbën e djathtë dhe problem me frymëmarrjen, e më pas sërish i zhdukur.
Këto janë episode që kanë shoqëruar zhdukjen nën rrënojat e tërmetit të rënë në Turqi, të ish-yllit të Chelesa dhe Neëcastle, Christian Atsu.
Pas dy tërmeteve të mëdha në Kahramanmaraş , Turqia vazhdon të shërojë plagët e viktimave të tërmetit, por çdo gjë është e paqartë rreth Atsu , i cili mbante veshur fanellën e skuadrës së qytetit Hatayspor.
Ditën e sotme ka qenë Presidenti i Federatës Turke të Futbollit , Mehmet Büyükekşi, ai që ka dalë në media për të sqaruar situatën në lidhje me futbollistin 31-vjeçar ganez.
Büyükekşi njoftoi situatën e Christian Atsu pas takimit të përbashkët të Shoqatës së Klubeve dhe TFF.
“Ne folëm me presidentin e Hatayspor për Christian Atsu. Ai tha se një person me ngjyrë shpëtoi nga rrënojat, por ai nuk e dinte nëse ishte Christian Atsu apo jo. Nuk ka qartësi të plotë. Shpresoj që ai të jetë në mesin e personave të shpëtuar nga rrënojat”, tha ai.
Sakaq, zëdhënësi i Hataysporit për mediat, Mustafa Özat tha në një deklaratë: “Ne e dimë se drejtori ynë sportiv Taner Savut është nën rrënoja, por nuk kemi mund ta shpëtojmë”.
Cristian Atsu mbrëmjen para tërmetit fitoi ndeshjen e luajtur me Kasimpasa me një gol të shënuar nga ai në 90+7 dhe pati një gëzim të çmendur me trajnerin Volkan Demirel. Ato pamje të dyshes ishin ndër më të shpërndarat në rrjetet sociale një ditë pas tërmetit.
