Tashmë është bërë ritual që dyert e Kryeministrisë “blindohen” para çdo proteste të organizuar nga opozita.
Pasditen e sotme, janë fotografuar punëtorë të cilët kanë blinduar Kryeministrinë me veshje metalike pasi Edi Rama mesa duket i frikësohet së tepërmi protestës së opozitës e cila ka paralajmëruar se rreth 100 mijë qytetarë do të dalin në shesh.
Protesta e opozitës e thirrur nga kreu i PD-së do mbahet ditën e nesërme në orën 12:00. Protestuesit do të mblidhen në selinë e PD-së, më pas në sheshin “Skënderbej”, në sheshin “Nënë Tereza”, pastaj për të vijuar drejt bulevardit “Dëshmorët e Kombit”.
Në një deklaratë për mediat ditën e sotme, kreu i PD, Sali Berisha paralajmëroi policinë që të mbajë qëndrim korrekt me protestuesit, pasi sipas tij për çdo person të lënduar do të mbahet përgjegjësi edhe pas 30 vjetësh.
Në kuadër të protestës janë angazhuar rreth 1500 forca të policisë, duke nisur nga ato të rendit, FNSH dhe Garda e Republikës. Si në çdo protestë, mësohet se do të krijohet kordoni me efektivë policie para Kryeministrisë dhe perimetrit rreth saj.
