Një kosh në fundin e periodës së tretë. Goditje që i dhuroi rekordin e ri të pikëshënuesve historikë në NBA amerikan.
Me 38,390 pikë, LeBron James është basketbollisti që ka realizuar më tepër pikë, duke kaluar legjendën Kareem-Abdul Jabbar.
Ai moment tërhoqi të gjithë vëmendjen, edhe pse Los Angelos Lakers u mposhtën me rezultatin 133-130 nga Oklahoma City Thunder.
Mbreti James e mbylli sfidën me 38 pikë, 7 topa të rikuperuar në tabelë dhe 3 asist. Primati me 38,390 pikë është realizuar gjatë karrierës së shkëlqyer 20 vjeçare, ku LeBron ka luajtur në total 1410 ndeshje.
I pranishëm në tribunë për këtë ngjarje historike ishte edhe Kareem-Abdul Jabbar, i cili zbret në vendin e dytë të renditjes speciale, aty ku mes të tjerëve janë edhe Karl Malone, Kobe Bryant e Michal Jordan.
Në fundin e lojës, mes emocioneve dhe brohoritjeve, Kareem-Abdul Jabbar i dhuroi LeBron edhe topin e rekordit të jashtëzakonshëm.
Statistikat e tjera mbresëlënëse të mbretit James përfshijnë edhe 2233 trepikësha të realizuar, si edhe 10,354 asist për shokët e skuadrës.
Shifra të një sportisti që duket më tepër si jashtëtokësor. Pasi ishte pjesë e Olimpit të yjeve historikë të NBA, LeBron James fitoi me të drejtë kurorën e më të mirit. Primati i vendosur prej tij, në moshën 39-vjeçare dhe afro 39 vjet pas Kareem-Abdul Jabbar nuk është pikëmbërritja. Udhëtimi i yllit të Lakers do të vazhdojë dhe primati do të vijojë të rritet.
