Tragjedia e shkaktuar nga tërmeti 7.8 ballë që goditi Turqinë në orën 04:00 të mëngjesit vijon të thellohet pasi numri i viktimave rritet pothuajse çdo orë, në një kohë që ekipet e shpëtimit punojnë për të nxjerrë të mbijetuarit nga rrënojat.
Sakaq, Presidenti Rexhep Taip Erdogan teksa tha se tërmeti është më shkatërrimtari i 84 viteve të fundit në vend, bëri me dije se Turqia shpall 7 ditë zie kombëtare.
Erdogan shkruan në rrjetet sociale se në të gjitha institucionet, flamujt do të varen në gjysmë-shtizë.
“Kemi shpallur 7 ditë zie kombëtare për shkak të tërmetit që goditi vendin tonë më 6 shkurt 2023. Flamujt kombëtarë nëpër institucione do të qëndrojnë në gjysmë-shtizë deri në perëndimin e diellit më datë 12 shkurt 2023”, shkruan presidenti turk.
Edhe shkollat do të qëndrojnë të mbyllura për 1 javë sipas një njoftimi që bëri ministri i Edukimit, Mahmut Ozer në një konferencë për mediat.
Ndërkohë, në shifrat e reja të publikuara nga mediat ndërkombëtare numri i të vdekurve ka arritur në 2619, me 1651 prej tyre që kanë ndërruar jetë në Turqi dhe pjesa tjetër e viktimave është regjistruar në Siri.
Autoritetet në Sirinë e kontrolluar nga qeveria regjistruan 538 vdekje, ndërsa 430 u konfirmuan në pjesët e kontrolluara nga opozita.
Mendohet gjerësisht se numri i të vdekurve do të vazhdojë të rritet për shkak edhe se komplekset e pallateve të shkatërruara kanë qenë të mbipopulluara.
Qyteti i Gaziantepit ishte epiqendra e tërmetit, por ai u ndje deri në Kajro dhe Bejrut.
Sizmologu Stephen Hicks, nga University “College of London”, tha se ai zgjati rreth 100 sekonda.
“Është një tërmet shumë i cekët nën një zonë shumë të populluar dhe në një rajon ku ndërtesat thjesht nuk mund ta durojnë këtë nivel të lëkundjeve”, tha ai për Sky Neës.
Të paktën 120 pasgoditje janë raportuar që atëherë nga Turqia, duke përfshirë një të fuqishëm me magnitudë 7.5 ballë rreth orës 13:30 me orën lokale.
Pothuajse 3,000 ndërtesa janë shembur vetëm në Turqi, sipas Erdogan.
Ndërtesa të shkatërruara u raportuan në një zonë të gjerë që shtrihet nga qytetet siriane të Aleppo dhe Hama deri në Diyarbakir të Turqisë, më shumë se 330 km në verilindje.
