Një shtetas shqiptar i dyshuar si një prej autorëve të atentatit me armë zjarri që i mori jetën 39-vjeçarit Briken Sanaj në zonën e Kodrës së Diellit, është arrestuar në Kosovë.
Mësohet se ka përfunduar në pranga Gjelosh Krasniqi, i dyshuar për vrasjen që ndodhi në orët e vona të mbrëmjes së 30 tetorit 2022, ku viktima Senaj sapo ishte kthyer nga një dasmë në Lezhë.
Personi i dyshuar është arrestuar të martën mbrëma në Pejë, ndërsa pas hekurave ka përfunduar edhe personi i cili e kishte ndihmuar që të strehohej në një fshat të zonës.
Ndalimin e tij e ka bërë të ditur zëdhënësi i Prokurorisë Themelore të Pejës, Shkodran Nikçi.
“Mbrëmë nga puna operative është arritur të arrestohet një person (me urdhër arrest ndërkombëtar) i cili dyshohet se ka qenë i përshirë vitin e kaluar për një vrasje në Shqipëri. Me urdhër të prokurorit, i dyshuari Gj.K., është ndaluar për 48 orë, ndërsa brenda afatit ligjor ndaj tij do parashtrohet edhe kërkesa për caktimin e paraburgimit. Për procedurat e mëtutjeshme rreth këtij rasti ju lutem i drejtoheni Ministrisë së Drejtësisë”, është shprehur ai për mediat.
Kujtojmë se Sanajt iu mor jeta nga të shtënat me armë në momentin kur ishte duke mbyllur makinën te garazhi i pallatit ku jetonte dhe është takuar me tre persona të njohur në trotuar.
Në momentin që ai ka zbritur nga makina, u qëllua për vdekje nga një distancë e afërt nga një makinë në lëvizje. Makina tip “Benz” që përdorën autorët u gjet e djegur pas ngjarjes në Qafë Kashar, ndërsa brenda saj u gjet një armë tip kallashnikov.
