Eksperti i Kriminalistikës Ervin Karamuço ka folur ditën e sotme në lidhje me operacionin e fundit nga ana e Policisë së Shtetit për çmontimin e kamerave në disa qytete që përdoreshin nga grupet kriminale për të mbajtur zona të caktuara nën monitorim.
I ftuar në ABC ai deklaroi se shkak për nisjen e aksionit është bërë shpërthimi me eksploziv në shtëpinë e një ish efektivi në Shkodër. Sipas Karamuços, aksioni duhet të kishte nisur në të njëjtën kohë në të gjithë territorin në mënyrë që qytetet e tjera të mos lëvizin para policisë për të bërë të mundur çaktizimin e tyre.
“Aksioni ka filluar pasi ka pasur një shpërthim me eksploziv në shtëpinë e një ish-efektivi në Shkodër por ka pasur në plan që aksioni të niste dhe në datën 15. Aksioni duhet të ishte i njëkohshëm dhe mos vononte në gjithë territorin po bëhet në mënyrë të rrezikshme. Kemi vendosur policë të pacertifikuar për të hequr kamerat. Aty duhet të shkojë OSHHE dhe persona të specializuar.
Duhet vlerësuar policia, por operacioni duhet të ishte i fshehtë dhe kamerat nuk kanë ende një pronar nuk dihet ku është IT ose serveri, ne ende nuk kemi identifikuar persona konkret”, tha ai.
Karamuço shtoi se në momentin kur hiqen kamerat, zhduken provat. Ai tha se pas nisjes së operacionit shumë kamera janë hequr ose janë dëmtuar.
“Fakti që nuk ka shtrirje të njëkohshme i jep kohë grupeve kriminale që kanë vendosur këto kamera. Në momentin që heqim kamerat ne zhdukim dhe provat për të ditur se kush i ka vendosur. Me të filluar operacioni shumë kamera janë dëmtuar dhe disa janë hequr pasi nuk duan të përballen, autorët rrezikojnë 2 vjet burg. Ata kanë shpejtuar të presin fijet që mos zbulohen.
Policia duhet të ishte futur në servera. Siç na ka ndodhur në vende të tjera janë hakeruar kamerat te cilat mund të ndihmonin ne kapjen e personave në krim. Kjo është gjë e mirë por kjo nuk na çon tek personat në kërkim. Disa prej kamerave janë vendosur për atentate, këto janë të dokumentuara ata kanë parë lëvizjet e tyre dhe i kanë vrarë.
Ne nuk dimë serverat, një është në Gjermani, një në Vlorë dhe një në Durrës. Tashmë policia duhet ta ketë të vështire të kapin personat në kërkim, këta të fundit do të vazhdojnë të shohin dhe me dronë pasi kanë mundësinë për blerjen e tyre”, deklaroi ai.
