Në dritën e diellit dhe pa u fshehur aspak nga Policia e Shtetit, qyteti i Shkodrës monitorohej prej kohësh nga 59 kamera që ishin vendosur në lagjet më strategjike, duke nisur nga rrethrrotullimi “5 Heronjtë” deri tek rrethrrotullimi i parë i bypassit të Shkodrës dhe nga rrethrrotullimi “5 Heronjtë” deri te rrethrrotullimi i Dobraçit.
Por nën orbitën dhe survejimin e mirëfilltë të krimit, të pashqetësuar nga drejtësia dhe forcat e rendit përveç kryeqendrës së Veriut është edhe një tjetër qytet problematik për dinamikën e ngjarjeve që ka prodhuar në raport me bandat.
Qyteti bregdetar i Vlorës sipas rezultateve të fazës së tretë të operacionit “Fijet”, rezulton se monitorohej gjithashtu me kamera.
Të paktën 16 prej tyre janë çmontuar nga policia ditën e sotme dhe mësohet se ishin të shtrira në një perimetër të gjerë mes 5 lagjeve kryesore, të cilat herë pas here shfaqen në lajmet e kronikës së zezë.
Kamerat e instaluara në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri” duket se i kanë dhënë akses të plotë grupeve kriminale që i kontrollojnë, për të parë se kush hyn apo del nga qyteti dhe për të ruajtur supermacinë mbi kundërshtarët.
Njoftimi i Policisë:
Vlorë/ Vijon faza e tretë e planit operacional policor të koduar “Fijet”. Plani operacional intensiv, i iniciuar nga Drejtoria e Përgjithshme e Policisë së Shtetit, në të gjitha qarqet e vendit.
Finalizimi i fazës së tretë të operacionit “Fijet”, rezultoi me çmontimin e 16 kamerave që kontrolloheshin nga kontigjenti kriminal, me qëllim informimin. Kamerat ishin vendosur në zona me frekuentim të lartë, në qytet.
Vijojnë hetimet në nivel qëndror dhe vendor, me qëllim identifikimin e shtetasve që i kontrollonin këto kamera, për qëllime kriminale.
Strukturat hetimore të DVP Vlorë në bashkëpunim me Komisariatin e Policisë Vlorë, në zbatim të detyrave të përcaktuara në kuadër të planit operacional mbarëkombëtar të koduar “Fijet”, i iniciuar nga Drejtoria e Përgjithshme e Policisë së Shtetit, si dhe me mbështetjen e inteligjencës informative, për vendosjen e paautorizuar të disa kamerave, në disa lagje të qytetit të Vlorës, me qëllim sigurimin e informacioneve për qëllime kriminale, si dhe për të monitoruar lëvizjet e Policisë, kanë organizuar punën për evidentimin dhe çmontimin e këtyre kamerave, identifikimin e pronarëve të tyre, si dhe për dokumentimin e plotë ligjor të qëllimit të përdorimit.
Shërbimet e Komisariatit të Policisë Vlorë kanë çmontuar dhe sekuestruar 16 kamera, të dyshuara të lidhura me aparate celulare të shtetasve të ndryshëm. Këto kamera ishin instaluar në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri”.
Kamerat e sekuestruara ishin vendosur pa lejen përkatëse të organeve kompetente. Vendosja e tyre është në kundërshtim me ligjin 9887, të datës 10.03.2008 “Për mbrojtjen e të dhënave personale” dhe përbën veprën penale “Ndërhyrje të padrejta në jetën private”, që parashikohet nga neni 121 i Kodit Penal.
Në bashkëpunim me Prokurorinë pranë Gjykatës së Rrethit Gjyqësor Vlorë, vijon puna intensive për identifikimin e shtetasve që kanë instaluar këto kamera, si dhe për zbardhjen e plotë të qëllimit të vendosjes së tyre.
