Ish-kryebashkiaku i Lushnjës, Fatos Tushës është liruar sot nga burgu pas një vendimi të Gjykatës së Posaçme të Apelit për Korrupsionin dhe Krimin e Organizuar.
Në këtë mënyrë shuhet masa e sigurisë “Arrest me burg” ndaj Tushes, i cili në korrik të vitit të kaluar u dënua me 2 vite e 4 muaj burg dhe heqje të së drejtës për të mbajtur funksione publike për 5 vite.
Ish-kryebashkiaku i Lushnjës u dënua pasi u zbuluan shpërdorimet me detyrën për shkak se lejoi një ndërtim pa leje në qytet.
Tushe gjithashtu rezultoi fajtor pasi kishte abuzuar me fondet e karburantit të bashkisë që ai drejtoi për më shumë se një mandat.
NJOFTIMI I GJYKATËS PËR MEDIAT:
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Florjan Kalaja kryesues, Igerta Hysi anëtare dhe Dhimitër Lara anëtar, sot më datë 26.01.2023, zhvilloi seancë gjyqësore për çështjen penale nr. 28 akti, datë 25.01.2023 regjistrimi, regjistruar mbi kërkesën e të pandehurit F.T., për konstatimin e shuarjes së masës së sigurimit personal “arrest në burg” dhe vendosi:
– Konstatimin e shuarjes së masës së sigurimit “arrest në burg” të caktuar ndaj të pandehurit z. F.T., me vendimin nr. 50 datë 05.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar. – Urdhërimin e lirimit të menjëhershëm të të pandehurit z. F.T. nga ambientet e paraburgimit nëse liria e tij personale nuk kufizohet për një shkak tjetër ligjor.
