Arrestimi i ish-zyrtarit të FBI-së, Charles McGonigal ishte një kal beteje për opozitën sot në Kuvend, ku me insistim u kërkuar që të ishte i pranishëm për të dhënë llogari kryeministri Edi Rama, i cili dyshohet se ka paguar “mikun e tij” amerikan për lobingje dhe sulme ndaj Partisë Demokratike.
Teksa i kërkoi kryetares së Kuvendit Lindita Nikolla që të thërrasë kryeministrin për t’i shpjeguar shqiptarëve përfshirjen në skandalin që po hetohet në Nju Jork, Enkelejd Alibeaj jashtë sallës së Parlamentit kërkoi që Prokuroria e Posaçme Antikorrupsion të tërheqë dosjen nga SHBA.
“I kapur në flagrancë nga drejtësia amerikane me dokumente të shkruara. Po të gërmosh kupton që është më i gjerë. E di që oligarku rus ka marrë edhe titullin e Investitor strategjik në 2 investime në Shqipëri në Shushicë dhe fushat e eksplorimit të naftës në Fier. Sot duhet të ishte momenti kur Rama të fliste. Vetëm kur je i pandehur ke të drejtë të heshtur. Mbase në subkoshiencën e tij ndjehet i tillë por ka detyrim ti përgjigjet shqiptarëve dhe ne se ka hedhur baltë për rublat ruse por paska enë ky me dollarë amerikanë që synimin e vetëm paska diskriminimin e asgjësimin e PD”, tha deputeti i PD.
Sipas Alibeajt kryeministri i Shqipërisë duhet të merret i pandehur dhe SPAK të nisë hetmet, pasi “gjysma shqiptare e korruptimit duhet t’i nënshtrohet drejtësisë në Shqipëri”.
“Nuk është më një çështje që e kanë bërë miqtë e tij e ka bërë vetë ai. Ka folur drejtësia amerikane, SPAK duhet të flasë. Gjysma shqiptare e korruptimit duhet t’i nënshtrohet drejtësisë në Shqipëri. SPAK të bëjë publik regjistrimin e hetimit. Mjafton një letër porosi e thjeshtë për drejtësinë amerikane që të marrë në dorë dokumentacionin. Këtë do ta ndjekim deri në fund”, theksoi Alibeaj.
