Çështja penale që përfshin ndër të tjerat akuzat për korrupsion të zyrtarit të lartë të FBI Charles McGonigal rrezikon të përfshijë drejtpërdrejt politikën shqiptare. I bindur për këtë është analisti Lutfi Dervishi. “Ngjarja është e bujshme, e përmasave që do të mbetet në historinë e politikës shqiptare. Për momentin tronditja më e madhe është në SHBA, pra që si mundet që një zyrtar kaq i lartë të korruptohet nga një shqiptar, dhe korrupsioni të depërtonte kaq e thellë”, tha ai në “A2 CNN”.
Sërish, sipas tij institucionet amerikane funksionojnë, ndërkohë që “në Shqipëri ka një tymnajë që përmblidhet me togfjalëshin akuza politike. Këtu kemi një zyrtar të fuqishëm amerikan që nuk raporton takimet me kryeministrin e Shqipërisë, aq fuqishëm sa që merr prokurorin nga Uashingtoni dhe e dërgon në Vjenë, takon biznesmenin politikan shqiptar dhe e merr në pyetje me përkthyes personin që e korruptoi, që fillon interesa biznesi, dhe personi B po prapë paguan për shpenzime të udhëtimit të hetimit të çështjes ndaj lobistit që lobonte për opozitën shqiptare”.
Sipas tij, “informacionet bazë vjen nga zyra e kryeministrit të Shqipërisë. Personi A që është Agron Neza, ka shërbyer si informator. Akuza është model sesi detajohet çështja. Ne dimë vetëm një pjesë të saj që ka ndodhur, dhe besoj se edhe nga gjyqi mund të kemi detaje të tjera”.
