Përpara gjysmëfinales në Kupën EFL kundër Nottingham Forest, Erik ten Hag ka deklaruar “se thatësira gjashtëvjeçare pa trofe e Manchester United është shumë e gjatë”.
Trofeu i fundit i United ishte ai i Europa League nën drejtimin e Jose Mourinhos në vitin 2017, ndërsa Ten Hag synon t’i japë fund këtij rekordi negativ.
“Është ndjenja më e mirë që mund të kesh, fitimi i një trofeu, dhe unë kam pasur fatin në karrierën time të fitoj disa trofe dhe është madhështore, veçanërisht për tifozët,” tha Ten Hag.
“Është shumë e mrekullueshme dhe mendoj se tifozët këtu kanë një përvojë të tillë, veçanërisht ata më të moshuarit. Në këtë periudhë, Manchester United nuk ka fituar trofe dhe është shumë kohë më parë. Ne jemi të vetëdijshëm për këtë fakt dhe duhet ta bëjmë përsëri.
Ka të bëjë me fitimin e trofeve, kështu që ne kemi një mundësi të mirë, por duhet ti marrim ndeshjet një e nga një. Tani ne luajmë me Nottingham Forest në dy ndeshje, kështu që fokusi do të jetë në ndeshjen e parë. Nuk mendoj për më tej, sepse kjo do të shpërqendrojë dhe kështu synimi për nesër është të fitojmë atë ndeshje.” – tha Ten Hag.
