Kur jemi katër muaj larg zgjedhjeve lokale të 14 Majit, në Tiranë mjetet e bashkisë janë vendosur në funksion të fushatës së Erion Veliajt, i cili është duke shtruar asfalt elektoral, në rrugica e lagje të cilat i ka lënë në harresë gjatë 8 viteve si kryebashkiak.
Këtë e tregoi kapja “gafil” që kandidati demokrat për bashkinë e Tiranës, Belind Këlliçi i bëri te rruga “Xhon Belushi”, ku letrat ishin kopsitur për një tender fiktiv prej 471 milionë lekësh, i përgatitur për klientët e Veliajt.
Por, Këlliçi vijon të denoncojë punët e pakryera të Veliajt përveç asfaltit elektoral dhe ndaj është ndalur në zonën e Astirit (Njësia 14), ku rruga “Loni Ligori” është harruar dhe qytetarët duhet të lëvizin mes pellgjeve me ujë dhe baltës në dimër, apo pluhurit në verë.
“Këto rrugë nuk i shihni asnjëherë në fotot e retushuara apo videot e montuara të kryetarit të Bashkisë Tiranë. Ky është realiteti ku jetojnë mijëra banorë të kryeqytetit”, shkruan Këlliçi në Facebook, duke treguar fytyrën e vërtetë të bashkisë më të madhe në vend, ndryshe nga ç’paraqesin kasetat e gatshme të Veliajt në televizione.
