Akuza të forta në drejtim të Ministrisë së Drejtësisë Ulsi Manja dhe kryeministrit Edi Rama ka hedhur sot morta e të ndjerit Saimir Sula, trupi i pajetë i të cilit u soll pa zemër nga Spanja, ku kishte shkuar për t’u trajtuar me ndihmë të specializuar mjekësore në një spital në Barcelonë.
Majlinda Sula ka treguar se ministri Ulsi Manja e ka bllokuar në telefon, pasi më parë e kishte pritur në zyrë në një ditë pushimi dhe i kishte premtuar që do t’a zgjidhte çështjen që lidhet me kërkesën e familjarëve për të realizuar një ADN të zemrës që autoritetet spanjolle kanë dorëzuar pas disa muajsh me pretendimin se i përket Saimirit.
“Zoti ministër më takoi para një viti, më priti në ditë pushimi, nuk e di pse zgjodhi një ditë pushimi. Më premtoi dhe dola shumë e kënaqur që aty. Dukej shumë i kujdesshëm, më premtoi dhe sapo dola nga aty më bëri bllok. Fillova t’i shkruaja pas dy tre ditësh dhe më bllokoi. Kam ngelur duke protestuar në çdo derë prokurorie. Kam ngelur derë më derë, këtu në institucione trajtohesh si qen, duke nisur që nga punonjësi i thjeshtë tek dera, edhe ai të trajton si qen”, tha Sula.
Duke mos i hedhur asnjëherë poshtë dyshimet se vëllai i ssaj është vrarë në spitalin ku shkoi për t’u kuruar, ajo ka akuzuar autoritetet spanjolle dhe shqiptare se heshtin pasi e gjithë historia lidhet me trafikun e organeve.
“Heshtja e institucioneve flet shumë. Jam e bindur se Saimiri u vra në spital në Barcelonë. Kërkojmë të bëhet ADN-ja, kemi dyshime. Vëllait tim i kanë hequr zemrën, ne do të protestojmë edhe në Bruksel. Ministri nuk ka kohë për një rast të trafikut të organeve. ADN kërkon familja, kemi 30 muaj që e kërkojmë. Në momentin që heshtin të gjithë institucionet unë kam të drejtën time të mendoj që Shqipëria dhe Spanja janë lidhur dhe kanë komunikuar. Rama dhe Sançes fshehin. Kjo heshtje të bën të dyshosh shumë gjera. Nuk di cfarë manipulimi mund të ketë. Nuk mund të kërkosh ADN e një zemre të bëhet në Spanjë kur ti si shtet akuzon Spanjën për trafik organesh. Zemra e Saimirit nuk ndodhet në Barcelonë, sepse po ta kishin në një laborator do bënin një ADN, nuk do zvarriteshe”, shtoi ajo.
Sakaq, ngjarja mbetet shumë e dyshimtë pasi asnjë zyrtar shqiptar nuk ka shkuar në Spanjë kur i riu Sula humbi jetën në mënyrë misterioze në një spital të Barcelonës ku shkoi për një temperaturë të lehtë.
Madje askush nuk e ngriti zërin kur trupi i të ndjerit mbërriti në Shqipëri me zemër të shkulur. Autoritetet spanjolle dhe ato shqiptare nuk kanë dhënë asnjë konkluzion të ngjarjes makabre.
Në 8 Maj 2020 Saimiri shkoi në spital për një test Covidi, pasi ishte me temperaturë. Testi rezultoi negativ. Majlinda, motra e tij, priste që Saimiri të dilte nga spitali, por pas një telefonate me të, nuk e pa më të gjallë vëllain. Spitali konfirmoi vdekjen e 31-vjeçarit rreth mesditës së 9 Majit 2020.
Fillimisht nga spitali u tha, që Saimir Sula është axhituar dhe gjatë momentit të neutralizimit nga rojet e spitalit, i ka pushuar zemra. Por e motra thotë se Saimiri kishte shenja dhune në trup, ndërsa Instituti i Mjekësisë Ligjore në Barcelonë nuk ka një konkluzion të saktë për shkaqet e vdekjes.
