Kapriçot e motit në këtë fillim viti që nisi me temperature pranverore prej 20 gradë celcius dhe vijoi me dimër të ashpër me reshje shiu dhe dëbore, duket se nuk kanë të ndalur.
Dinamikat e muajit janar pritet të ndryshojnë sërish në javën e fundit, pasi pritet që të rikthehet diellli, por temperaturat do të zbresin deri në -5 gradë celcius.
Sakaq, dita e sotme nisi me diell por gjatë mbrëmjes do të kemi zhvillim të vranësirave, që do të sjellin reshje të pakta shiu kryesisht në jug. Ndërkohë në zonat malore do të kemi prezente reshjet e bores.
Sipas sinoptikanit Hakil Osmani nga Meteoalb “dita e hënë do të nisë me prezencën e vranësirave të shumta dhe reshjeve të shiut, më të fokusuara këto në zonat jugore, ndërsa në zonat malore do të kemi reshje dëbore”.
“Duke filluar nga e marta e në vijim do të kemi edhe orë me diell në vendin tonë, por herë pas here do të kemi do të kemi vranësira të shpeshta të cilat do të zhvillohen duke sjellë reshje të pakta shiu në Ultësirën Perëndimore dhe reshje bore në zonat malore. Temperaturat në javën e fundit të janarit do të zbresin -5 gradë Celcius në qytetet e zonave malore, ndërsa maksimumet luhaten në 13 gradë Celcius në Ultësirën Perëndimore. Përsa i përket parametrit të erës, mbretet disi problematik gjatë ditës së sotme, por duke filluar nga e hëna e tutje do të kemi dobësim të erës”, shpjegon ai.
