I arrestuari Matteo Messina Denaro u bë lideri i padiskutueshëm pas vdekjes së Salvatore ‘Toto’ Riina në 2017 dhe krahut të tij të djathtë, Bernardo Provenzano, në 2016 – por me atë tani jashtë skenës, një vakum mund të hapet për pushtetin në krye të rrjetit famëkeq të krimit.
Arrestimi i një bosi mafioz vrasës, i cili kishte qenë në arrati për dekada të tëra, ka nxitur lehtësim në të gjithë Italinë – ndërkohë që ka ngritur një pyetje të ngutshme: Çfarë do të bëhet me mafia tani?
Matteo Messina Denaro u arrestua më 16 janar teksa ishte në një takim në spital, ku po merrte trajtim për kancerin.
Ai ishte në arrati që nga viti 1993 dhe u burgos në mungesë për vrasjet që kreu në fillim të viteve 1990.
Por me Messina Denaro tani jashtë skenës, kush është gati të marrë kontrollin e mafies?
Pse ishte ai i rëndësishëm për mafian?
Teksa Messina Denaro ishte i arratisuri më i kërkuar i Italisë dhe bosi kryesor i mafies, disa ekspertë thonë se ai nuk i kontrollonte të gjitha klanet mafioze – pjesërisht sepse ai nuk ishte nga kryeqyteti sicilian i Palermos.
Megjithatë, ai u cilësua si “kumbari i fundit” dhe ishte anëtari i fundit i arratisur i një brezi mafiozësh që organizuan një varg bombash dhe vrasjesh që terrorizuan Italinë në fillim të viteve 1990.
Njeriu që dikur ishte “bosi i të gjithë bosëve”, Salvatore ‘Toto’ Riina, u arrestua në 1993 dhe vdiq në 2017. Dora e tij e djathtë, Bernando Provenzano, u arrestua në 2006 dhe vdiq në 2016.
Sipas disa ekspertëve, “Cosa Nostra-s”, siç njihet mafia siciliane, i ka munguar një lider suprem për vite me radhë, ndoshta që nga Riina – pjesërisht për shkak se klanet e ndryshme luftuan për t’u mbledhur dhe për të zgjedhur një të tillë.
Historiani John Dickie, i cili shkroi librin “Cosa Nostra: Historia definitive e mafies siciliane”, i tha Sky Neës se mafia është shkatërruar, duke sugjeruar se mund të ketë vështirësi për të gjetur dikë që të udhëheqë grupin e klaneve rreth Palermos.
Ai tha se “hierarkia e mafies, struktura e saj drejtuese, e gjithë struktura e saj territoriale… është ndërprerë jashtëzakonisht” që nga fillimi i viteve 1990.
Por disa hetues e shohin mafian siciliane si një “strukturë me një kokë” – dhe besojnë se ajo është në kërkim të super-shefit të saj të ri.
Duke folur për të ardhmen e mafies menjëherë pas arrestimit të Messina Denaro, prokurorja e përgjithshme e Palermos, Lia Sava tha: “Çfarë do të ndodhë në detaje, nuk mund ta dimë”.
“Por një gjë është e sigurt: Cosa Nostra përbëhet nga rregulla. Ajo ka mbështetur veten në këto rregulla për 150 vjet, kështu që me siguri do t’i vërë në lëvizje ato rregulla për të riparuar dëmet, dhe kështu do të krijojë strukturën e re drejtuese të nevojshme pas arrestimit”.
Kush mund të bëhet shefi i madh?
Pra, nëse klanet mblidhen rreth tryezës dhe zgjedhin një kryetar të ri, kush do të ishte në garë?
Sipas shumë raporteve në Itali, 85-vjeçari Settimo Mineo është një kryesues. Zyrtarisht, ai drejton një dyqan bizhuterish në Palermo, por ai konsiderohet gjithashtu një nga krerët më të vjetër të mafies, duke u emëruar si pasardhës i Riina-s pas vdekjes së tij.
Mineo, si shumë anëtarë të mafies, aktualisht po vuan një dënim të gjatë me burg pasi u arrestua me dyshimin se ishte shefi kryesor i mafies – por nuk është e pazakontë që drejtuesit ta drejtojnë biznesin nga prapa hekurave.
Corriere della Sera, gazeta kryesore italiane, beson se 64-vjeçari Giovanni Motisi – i njohur për shumicën si “Fatmani”, mund të jetë i radhës.
Ai është shefi i qarkut Pagliarelli të organizatës në Palermo dhe ka qenë në arrati që nga viti 1998 pasi u shpall fajtor për vrasjen e një oficeri policie. Motisi besohej gjithashtu të ishte vrasësi më i besuar i Riina.
Ai është një nga njerëzit më të kërkuar në Itali, madje disa thonë se mund të ketë vdekur.
Gazeta e përditshme thotë gjithashtu se Giuseppe Auteri (48 vjeç), arkëtari i lagjes më të pasur mafioze në Palermo, është në garë.
Edhe pse një pengesë për Auterin mund të jetë fakti se ai ka qenë në arrati për një vit në nënbarkun sicilian.
Sandro Capizzi gjithashtu ka ambicie lidershipi në Siçili, sipas Sky Tg24. Babai i 41-vjeçarit, Benedetto, u përpoq të merrte pushtetin në “Cosa Nostra” me forcë në vitin 2008, por dyshja u arrestuan nga policia që kishte frikë se Siçilia ishte në prag të një lufte të re mafioze.
Por, i riu i dyshes është i lirë nga burgu dhe thuhet se është duke luftuar për kryesimin.
Pra, çfarë do të ndodhë më pas për Cosa Nostra-n?
Pavarësisht famës së saj si një sindikatë e fuqishme dhe e pamëshirshme e krimit, mafia ka luftuar për vite me rradhë.
Në tregun fitimprurës të drogës, ajo është zëvendësuar nga “’Ndrangheta”, një organizatë me bazë në rajonin e Kalabrisë në Italinë jugore.
Megjithëse mafia ruan kontrollin e Sicilisë dhe disa pjesëve të ekonomisë, Anna Sergi, një eksperte e krimit të organizuar në Universitetin e Essex, tha: “Messina Denaro ishte kumbari i fundit, ai përfaqësonte të gjitha sekretet e “Cosa Nostra-s”. Është fundi i një miti dhe organizata do të duhet të përballet me këtë”.
