Reshjet e borës që kanë përfshirë veriun e vendit kanë sjellë bllokimin e “Rrugës së Arbrit”. Raportohet se dhjetëra makina kanë mbetur të bllokuara te ”By Passin” në Qafën e Murrizit.
Nisur nga situatë, policia u bën apel drejtuesve të mjeteve që të shmangin këtë aks dhe të ndjekin rrugën e vjetër.
“Si pasojë e reshjeve të dëborës, aksi rrugor Klos-Qafë Murrizë është bërë i pa kalueshëm për mjetet dhe subjekti kontraktor po punon për pastrimin dhe hapjen e rrugës për qarkullimin e automjeteve. Policia Rrugore apelon për të gjithë drejtuesit e mjeteve që lëvizin në drejtim të Tiranës dhe anasjelltas të të ndjekin aksin e vjetër Klos-Burrel-Ulëz e anasjelltas dhe të zbatojnë me rigorozitet rregullat e qarkullimit rrugor”, thuhet në një njoftim të policisë.
“Patrullat e Policisë Rrugore të DVP Dibër dhe Patrullat e Komisariatit të Policisë Rrugore Tiranë kanë koordinuar veprimet në të dyja anët e bypass-it në Qafë Murrizë, duke marrë masa për të mos lejuar lëvizjen e automjeteve deri në pastrimin e rrugës. Në rast nevoje për ndihmë, telefononi në numrin 112 ose dërgoni njoftim në Komisariatin Dixhital”, thuhet më tej në njoftim.
Në këtë aks ka probleme të vazhdueshme sa herë ka reshje shiu e dëbore. Kryeministri Edi Rama e ka përdorur rrugën duke e paraqitur si një investim i qeverisë. Megjithatë situata në terren përgënjeshtron propagandën e qeverisë.
