Përfaqësuesi i BE-së për dialogun ndërmjet Beogradit dhe Prishtinës, Miroslav Lajçak, pas takimit me Vuçiç, tha se Presidenti serb tregoi gatishmëri për të marrë vendime të vështira në interes të paqes dhe perspektivës evropiane të Serbisë.
Lajçak tha për mediat në Beograd se biseda mes emisarëve ndërkombëtare dhe Vuçiç ka qenë “shumë intensive dhe e vështirë, por e sinqertë dhe e hapur”.
“Presidenti Vuçiç tregoi një qasje të përgjegjshme dhe gatishmëri për të marrë vendime të vështira në interes të paqes dhe perspektivës evropiane të Serbisë. Për ne, zbatimi i plotë i marrëveshjes për Asociacionin e Komunave Serbe është element kyç për stabilitet”, tha Lajçak.
Ndër të tjera Lajçak shtoi se BE, SHBA, Franca, Gjermania dhe Italia mbeten të bindura se plani franko-gjerman për Kosovën është mënyra më e mirë për normalizimin e marrëdhënieve ndërmjet Serbisë dhe Kosovës dhe për integrimin evropian të rajonit.
“Puna jonë do të vazhdojë pa vonesa”, nënvizoi Lajçak.
