Një gol i shënuar nga Fedriko Kieza, pak minuta para fundit, i ka dhënë Juventusit një fitore të rëndësishme dhe kalimin në turin tjetër në Kupën e Italisë. Bardhezinjtë kanë mundur Monzën duke shmangur një tjetër shuplakë pas asaj që kishin marrë në kampionat nga kjo skuadër.
Edhe pse me shumë lojtarë të rinj në formacionin titullar, Juventusi e nisi mirë sfidën, duke gjetur shpejt golin me anë të Ken. Por Monza nuk u dorëzua dhe pas pak minutash barazoi shifrat me Valotin, duke nervozuar jo pak bardhezinjtë të cilët nuk po gjenin të çarën për të siguruar suksesin.
Alegri hodhi në fushë emra si Lokateli, Aleks Sandro, Kieza e Di Maria dhe kjo rriti trysninë në sulm të bardhezinjve, të cilët gjetën golin më në fund me sulmuesin anësor italian pas një aksioni individual të shkëlqyer.
Kështu, Juventusi mbylli duelin me fitoren 2-1 dhe siguroi kalimin mes 8 skuadrave më të mira në Kupën e Italisë.
