Në momentin më të rëndësishëm të sezonit, teksa ndodhen në krye dhe favorit kryesor për të fituar titullin kampion, Partizani dhe trajneri Colella duhet të bëjnë llogaritë pa liderin e ekipit, pa kapitenin, Eneo Bitri.
Merkato trazon edhe njëherë kartat në shtëpinë e kuqe, pasi një ofertë nga Superliga çeke ka bindur Bitrin të largohet nga kryeqyteti. Aktualisht qendërmrbojtësi ka nën kontratë edhe 6 muaj te demat dhe kjo është arsyeja se përse klubi çek Banik Ostrava do të duhet të paguajë 150 mijë euro për shërbimet e djaloshit nga Berati. Zbulohet se dëshira e futbollistit ka qenë e madhe për të nisur këtë aventurë jashtë vendit, vetëm 1 vit pas rikthimit te Partizani dhe drejtuesit kanë pranuar.
Megjithatë, të kuqtë kanë menduar edhe për zëvendësuesin e kapitenit, i cili pritet të jetë një futbollist që ka bërë mirë në futbollin shqiptar. Bëhet fjalë për Mevlan Adilin, i cili ka prishur kontratën me klubin rus, Khabarovsk, vetëm 6 muaj pas largimit nga Vllaznia. Në garë për shërbimet e mbrojtësin janë edhe shkodranët, por demat janë më pranë transferimit të tij në skuadër.
