Moti i keq, me reshje shiu dhe erë të fortë ka shkaktuar problematika edhe në qarkun e Kukësit.
Përpos mungesës së energjisë elektrike, së fundmi raportohet se shqetësuese është rënia e vazhdueshme e masivit të gurëve dhe dherave në rrugët nacionale dhe ato rurale.
Firmat kontraktuese kanë nxjerrë në terren mjetet dhe punonjësit e tyre për mbajtjen hapur dhe në monitorim të akseve, pavarësisht rrëzikut që u vjen edhe vetë këtyre të fundit duke punuar në kushte ekstreme të motit.
“Rruga është e vështirë pasi të rrezikohet jeta. Gurët mund ti bjenë në xham, poshtë gomës, kshu që është shumë e rrezikshme. Sot nuk kishte shumë rënie gurësh“, është shprehur një shofer .
“Lëvizja është e vështirë, shmang gurët dhe bën aksident me tjetrin,” ka thënë një tjetër shofer i cili përdor këtë aks rrugor.
Reshjet e shiut kanë ndikuar në rritjen me shpejtësi edhe të nivelit të ujit në liqenin e Fierzës, duke rritur edhe rrezikun për shkarkime, të cilat do të kishin efekt mbi dy ujmbledhësit e tjerë të lumit Drin, atij të Komanit e Vaut të Dejës. Shkarkime të cilat pasohen me përmbytje të zonës së nën Shkodrës.
