Një tërmet i fortë ka shkundur dje vendin tonë ndërsa epiqendra ka qenë në Klos. Sizmiologu Edmond Dushi në një intervistë për “Faxnews”, ka thënë se tërmeti i mbrëmjes së djeshme ka qenë me magnitudë 4.7 të shkallës rihter ndërsa ka qenë 5.5 ballë.
Dushi shtoi se deri tani ka rreth 62 pasgoditje ndërsa magnituda ka ardhur duke u zvogëluar.
Tërmeti më fuqishëm, zbuloi sizmiologu, zgjati 21 sekonda.
“Tërmeti që u regjistrua kishte një magnitude 4.7 të shkallës rihter, ndërsa 5.5 ballë. Kur flasim për rihter është ajo cfarë pajisjet regjistrojnë, ndërsa ballë është efekti në zonën ku bie. Aktiviteti ka nisur kohë më parë që në datën 12. Ka pasur një frenim ditën e djeshme dhe kjo shënoi atë tendencën për të pasur magnitudë të madhe. Deri tani kemi rreth 62 pasgoditje dhe magnituda ka ardhur duke u zvogëluar.
Deri në një farë magnitude pritet të mos ketë efekte dhe më tej të ketë ndjeshmëri. Ne i klasifikojmë në disa klasa, në bazë të magnitudave. Ne nuk jemi në pozicion që të japim një alert disa sekonda përpara. Qytetarët duhet të parapërgatiten. Jetojmë në një vend që dukuria sizmike është prezente, duhet të jemi të organizuar në shtëpi, ku është këndi apo pozicioni më i sigurt, të evitojmë ashensorët, apo shkallët. Të ulim automatin apo edhe gazin. Tërmeti ka qenë 21 sekonda”, tha ai.
