Korporata Elektroenergjetike Shqiptare (KESH) ka hapur prej mesditës së sotme portat e shkarkimit në hidrocentralin e Fierzës.
Mendohet se hapja e portave ka ardhur si pasojë e reshjeve të shiut të cilat janë rikthyer mbi territorin e vendit pas disa ditëve me diell, por të shoqëruara me temperatura të ftohta. Reshjet kanë bërë që të rritet niveli i prurjeve në hidrocentral, duke arritur kuotën maksimale në 288 metra.
Shqiptarët gjatë gjithë dimrit ndihen të kërcënuar ku përveç burgut për lidhje të paligjshme të energjisë elektrike, kryeministri Edi Rama në çdo dalje për mediat fliste për vendosjen e fashës “800 kWh” të energjisë elektrike (pra 42 lekë kilovat/orë) nga e cila mund të preken mbi 100 mijë familje.
Nga ana tjetër opozita ka denoncuar korrupsionin që sipas saj përfshin qeverinë Rama e cila gjatë stinës së verës shet energji elektrike më lirë, ndërsa në dimër detyrohet që ta blejë “si frëngu pulën” dhe më pas mundohet që fajtorin ta gjejë tek familjet shqiptare të cilat për shkak të krizës së rëndë ekonomike e kanë të pamundur të përballojnë jetesën.
